Chén chüen'go atushtiki ziyaritide sotsiyalistik atush qurup chiqishni telep qildi
2016.12.08
Xelq torida bérilgen xewerdin qarighanda, Uyghur aptonom rayonluq partkomning sékrétari chén chüen'go 6- 7- dékabir künliri atushni ziyaret qilip, atushtiki asasiy qatlam kadirliri, diniy zatlar, qosh til yesliliri we j x kadir - saqchiliri, qoralliq saqchi ofitsér - eskerliri bilen körüshken.
Chén chüen'go ulargha mundaq dégen: “ Ijtima'iy muqimliq we ebediy eminlik bash nishanini her waqit ésimizde ching saqlap, térrorluqqa qarshi turush, muqimliqni qoghdashni hemmini bésip chüshidighan siyasiy wezipe, teyshen téghidinmu éghir siyasiy mes'uliyet, dep qarishimiz kérek.. “Milletler ittipaqliship bir a'ile kishiliridek bolush” pa'aliyitini keng we pa'al qanat yaydurup, milletlerning alaqisi, arilishishi, almashturushini ilgiri sürüsh kérek... Wetenperwer diniy zatlarni terbiyelep, qoghdap, qanunsiz diniy pa'aliyetlerni qanun boyiche tüzesh kérek؛ asasiy qatlam partiye teshkilatlirini kücheytip, partiyening shinjangdiki hakimiyet yürgüzüsh asasini mustehkemlep, shinjangning ijtima'iy muqimliqi we ebediy eminlikini küchlük siyasiy kapaletke ige qilish kérek.”
Chén chüen'go sékrétar bolghandin béri, Uyghur élidiki yézilarda “Qosh til yesli” qurulushini alahide ching tutup ishleshke bashlighan, u bu nöwet atushtimu aghu yézisidiki bir yeslini ziyaret qilip, qosh til ma'aripini kücheytish, balilarni kichikidin sotsiyalistik ang we milletler ittipaqliqi éngi bilen terbiyileshning menggülük eminlik yaritishtiki ehmiyitini tekitligen.
Chet'ellerdiki Uyghur közetküchiler, chén chüen'goning yuqirida éytqanlirining Uyghurlargha mejburiy téngiliwatqan we Uyghurlar eng qattiq narazi boluwatqan siyasetler ikenlikini we buni izchil dawamlashturushning éghir aqiwetlerni peyda qilidighanliqini bildürdi.