Xitay da'iriliri diniy zatlarni étiqadchi ammini “Mötidil yol” da tutup turushqa dewet qildi

Muxbirimiz shöhret hoshur
2017.11.08

Uyghur aptonom rayonida “8-Nöwetlik wetenperwer diniy zatlarni terbiyelesh kursini püttürüsh murasimi we xulase yighini” 7-noyabir küni ürümchide ötküzülgen.

“Shinjang géziti” ning bügünki bu heqtiki xewiridin melum bolushiche, mezkur yighinda dinni xitaylashturush we islam dinini sotsiyalizmgha maslashturush qatarliq kona chaqiriqliri tekrarlan'ghandin bashqa yene atalmish “Wetenperwer diniy zatlar”, étiqadchi ammini “Mötidil yol” da tutup turushqa chaqirilghan.

Muhajirettiki Uyghur közetküchilerning qarishiche, xitay da'iriliri yéqinqi yillardin béri “Diniy esebiylik” ke qarshi sho'arni köp tekitligen bolsimu, “Mötidil yol” términini bek köp qollanmighan. Dunya Uyghur qurultiyi diniy ishlar komitétining mudiri turghunjan alawudun ilgiriki bayanlirida, Uyghurlarning ezeldinla mötidil yolda ikenlikini, emma xitay da'irilirining islamdiki mötidil yoldinmu endishe qilidighanliqi, shunga ashkara halda dinni xitaylashturushni teshebbus qiliwatqanliqini ilgiri sürgen idi.

Turghunjan alawudunning qarishiche, xitay bu jayda teshebbus qiliwatqan “Ottura yol”, islamdiki heqiqiy mötidilliq emes, peqet xitayning zorawanliq we adaletsizlikige süküt qilish we uninggha maslishishtur.

Xewerlerdin melum bolushiche, xitayning bu qétimqi “Mötidil yol” chaqiriqi, minglighan diniy zatlar “Yépiq terbiyelesh merkezliri” ge soliwélin'ghan, qaraqash purchaqchidiki qurban baratqa oxshash ilgiri mukapatlan'ghan atalmish “Wetenperwer diniy zatlar” ningmu perzent we newriliri “Diniy esebiylik” bilen eyiblinip késiwétilgen bir mezgilge toghra keldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.