“Erkinlikke tutushidighan qarangghu yol” namliq kitab neshr qilindi

Türkiyediki ottura asiya mutexessisi enwer altayli yazghan “Erkinlikke tutushidighan qarangghu yol” namliq kitab in'glizchigha terjime qilinip, yéqinda en'gliyede neshr qilindi.

Mezkur kitab aldi bilen türkiyede türkche neshr qilin'ghan bolup, uningda öktebir inqilabining harpisida merghilanda tughulup ösken rozi nezerning qandaq qilip sowét qizil armiyiside esker bolghanliqi, ikkinchi dunya urushigha qatniship gérman eskerlirige esirge chüshkenliki, urush yillirida natsistlar gérmaniyesi teshkil qilghan türkistan déwiziyiside ofitsér bolghanliqi, urushtin kéyin amérika armiyisige teslim bolghanliqi we kéyinki hayatida amérikaning merkiziy axbarat idariside ishlep pénsiyige chiqqanliqidek murekkep weqeler bayan qilin'ghan.

Qiziqarliqi shuki, mezkur kitabta rozi nezerning soghuq urush mezgilidiki mexpiy pa'aliyetlirige da'ir nurghun melumatlar bérilgen. Bolupmu uning amérikaning diplomatiye xadimi süpitide soghuq urush yillirida sabiq gherbiy gérmaniyening paytexti bon we türkiyening paytexti enqerede élip barghan mexpiy pa'aliyetliri, 1979-yilidiki iran islam inqilabi mezgilide téhranda görüge tutulghan amérika diplomatlirini qutquzush opératsiyeside oynighan roli heqqide bayanlar bérilgen.

Kitabta yene 1955-yili hindonéziyening bandong shehiride échilghan “Asiya-afriqa yighini” da rozi nezerning otturigha chiqip xitay bash ministiri jo énleyni qattiq mat qilghanliqi, xitay kommunistlirining Uyghurlar wetini bilen tibetni bésiwalghan qizil mustemlikichi ikenliki heqqide yighin ehlige söz qilghanliqi toghriliqmu melumatlar bérilgen.

Nöwette bu kitab “Amazon” tori arqiliq sétiliwatqan bolup, ottura asiyaning 20-esirdiki tarixiy özgirishlirige qiziqquchilarning diqqet-étibarini qozghimaqtiken.