Uyghur aptonom rayoni esebiylikke qarshi turushqa a'it bir yéngi qanuniy nizamni békitti

Muxbirimiz ümidwar
2017.03.29

“Tengritagh tori” ning xewiridin ashkarilinishiche, 29-mart küni Uyghur aptonom rayonluq 12-qétimliq xelq qurultiyi da'imiy hey'et ezalirining 28-qétimliq yighinida 43 da'imiy hey'et ezaning awazi bérishi bilen 50 maddiliq “Aptonom rayonning esebiylikni tügitish nizami” qarardin ötküzülgen.

Yighin'gha riyasetchilik qilghan xelq qurultiyi mudiri neyim yasin mezkur nizamgha baha bérip, “Mezkur nizam esebiylikning chégrasini roshen békitip berdi, esebiylikning aldini qandaq élish, uni qandaq cheklesh we qandaq yoqitish qatarliqlarni körsitip berdi” dégen.

Mezkur 50 maddiliq nizamda esebiylikning ipadisi süpitide 15 tarmaq nuqtilar tepsiliy körsitilgen bolup, bular qatarigha: “Bashqilarning diniy étiqad erkinlikige arilishish, bashqilarni diniy pa'aliyetlerge qatnishishqa zorlash, radi'o, téléwiziye qatarliqlarni chetke qéqish, yémekliklerning halalliq uqumini kéngeytish, perzentlirining dölet ma'aripi terbiyesi élishigha yol qoymasliq” we bashqa köp xil mezmunlar kirgen.

Mezkur nizamda yene hökümetning munasiwetlik organliri we jem'iyetning her qaysi tereplirining esebiylikni tügitish mes'uliyetliri konkrét békitilgen.

Bu munasiwet bilen dunya Uyghur qurultiyining bayanatchisi dilshat rishit inkas qayturup, mezkur yéngi nizamning Uyghurlarning diniy erkinliki, söz- metbu'at erkinliki qatarliqlarni öz ichige alghan kishilik hoquq erkinliki qatarliq eqelliy insan heqlirini téximu dexli-terzge uchritidighanliqini we buning Uyghurlarni esebiylik hem térrorluq qalpiqi kiydürüp jazalashni qanunlashturushqa urunush ikenlikini bildürdi.

Mezkur nizam 4-ayning 1-künidin étibaren Uyghur rayoni da'iriside resmiy yolgha qoyulidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.