Go wéngüy «uyghurlarning ehwali bilingendin köp éghir» dédi

Muxbirimiz irade
2017-10-05
Élxet
Pikir
Hembehr
Print
  • Print
  • Hembehr
  • Pikir
  • Élxet

Xitaydiki yuqiri derijilik emeldarlar we xitay hökümitige ait ichki ishlarni ashkarilash bilen tonulghan, sürgündiki xitay milyardér go wéngüy uyghurlar weziyitining axbaratqa ashkarilanghandin köp éghir ikenlikini otturigha qoydi.

U bu sözlerni 5-Öktebir amérika paytexti washingtondiki «döletlik axbaratchilar kulubi» da uyushturghan muxbirlarni kütüwélish yighinida otturigha qoydi.

Nurghun axbarat organlirining muxbirliri we teshkilat-Jemiyetler wekilliri qatnashqan bu axbarat yighini «yuwtup» tori arqiliq neq meydandin tarqitildi. U, axbarat élan qilish yighinini «méning bu yerde bügün hayat olturup siler bilen körüshüshüm asangha toxtimidi» dégen söz bilen bashlidi.

Bu qétimqi muxbirlarni kütüwélish yighinigha amérika uyghur kishilik hoquq qurulushi bashliqi ömer qanat ependimmu qatnashqan bolup, u, go wéngüydin uyghurlarning ehwali heqqide soal soridi.

Go wéngüy buninggha jawab bérip «men uyghurlar heqqide nurghun ishlarni bilimen. Chünki xitayda dölet xewpsizlik ministirliqining muawin ministiri bolghan hem shundaqla shinjang ishlirigha mesul bolghan ma jiyen méning yéqin dostum idi. Men uning bilen uzundin buyan tonush. U manga shinjang toghruluq nurghun ishlarni éytip bergen. Qisqisi, u yerdiki emeliyet chetel axbaratlirida ashkariliniwatqandin we perez qilinghandin köp köp éghir» dédi.

U yene sözini dawam qilip «men aldimizdiki künlerde shinjang we shizanggha munasiwetlik bilidighan ehwallirimni amérika hökümitige yetküzüp, xitay hökümiti shinjang we shizang heqqide ilgiri sürüwatqanlarning yalghanliqini ashkarilaymen. Buni ashkarilash bek muhim, chünki ularning bu rayonlarda qiliwatqini insanliqqa xilap» dédi.

Go wéngüy yuqirida tilgha alghan ma jiyen 2006-Yilidin buyan xitay dölet xewpsizlik ministirliqining muawin ministiri bolup wezipe ötigen bolup, u asasliq xitayning jasusluqqa qarshi sahesige mesul bolghan iken.

Ma jiyen ötken yili parixorluq bilen eyiblengen, 12-Ayda xitay kompartiyesidin qoghlap chiqirilip, teptish organlirigha tapshurulghan.

Közetküchiler, uning délosining muddetsiz qamaq jazasigha höküm qilinghan ju yüngkanggha baghlap qattiq bir terep qilinidighanliqini texmin qilishqan idi.

Toluq bet