Amérika, gu wénguyning washingtondiki paaliyitining xitayning tor hujumigha uchrighanliqini delillidi

Muxbirimiz erkin
2017-10-06
Élxet
Pikir
Hembehr
Print
  • Print
  • Hembehr
  • Pikir
  • Élxet

Amérika edliye ministirliqi sürgündiki xitay milyadér gu wéngu 4‏-Öktebir nutuq sözlimekchi bolghan amérika xudson institutining tor hujumgha uchrighanliqini we tor hujumni xitayning qilghanliqini delilligen.

Amérika «wol-Strét zhurnili» gézitining jüme küni xewer qilishiche, amérika edliye ministirliqining bayanatchisi xudson instituti uchrighan bu qétimliq tor hujumining xitayning shangxey shehiridin kelgenlikini bildürgen. Edliye ministirliqi bayanatchisining bildürüshiche, amérika edliye ministiri jéf séshéon shu küni bu mesilini derhal washingtonda ötküzülüwatqan amérika-Xitay qanun organliri we tor bixeterlik dialogida otturigha qoyghan.

Go wénguy esli 4‏-Öktebir küni xudson institutida doklat sözlep, xitayning jasusluq herikiti we kompartiye siyasiy byorosidiki bezi emeldarlarning xiyanetchilik setchilikige dair bezi mexpiyetliklerni ashkarilaydighan bolghan. Biraq xudson instituti bir qanche saet awwal doklat bérish yighinini bikar qilghan idi.

«Wol-Stréit zhurnili» gézitining xewiride bayan qilishiche, xudson instituti xitayning qattiq bésimi we tor hujumining netijiside gu wénguyning nutuq sözlishishni bikar qilghan. Shuning bilen gu wénguy 5‏-Öktebir amérika memliketlik axbarat kulubida axbarat yighini ötküzgen. U, axbarat yighinida uyghur weziyiti heqqidiki bir soalgha jawab bérip, uyghurlar weziyiti axbarat ustilirida ashkarilanghandin köp éghir ikenlikini bildürgen. U, xitay dölet xewpsizliki ministirliqining sabiq muawin ministiri ma jyenning özige shinjang heqqide nurghun ishlarni éytip bergenlikini eskertip, «u yerning emeliy ehwali chetel axbaratlirida ashkariliniwatqandin we perez qilinghandin köp éghir» dégen idi. Ma jyen burun xitay dölet xewpsizliki ministirliqining térrorluq ishlirigha mesul emeldari bolup, 2016‏-Yili dékabirda qolgha élinghan idi.

Toluq bet