Uyghur aptonom rayon da'iriliri déhqanlarni heqsiz ishlitishni bikar qilghanliqini élan qildi
2017.02.05
Köp yillardin buyan Uyghur déhqanlirining naraziliqlirini qozghap kéliwatqan hashar qatarliq heqsiz emgekke sélish Uyghur aptonom rayoni da'iriliri teripidin bikar qilin'ghanliqi élan qilindi.
Tengri tagh torining bu heqtiki uchuridin melum bolushiche, 4-féwral, Uyghur aptonom rayonluq partkom we aptonom rayonluq hökümet uqturush chiqirip, pütün Uyghur diyari da'iriside yéza mejburiyet emgikini bikar qilghanliqini jakarlighan.
Uqturushta: yéza mejburiyet emgikini asas qilghan barliq shekildiki heqsiz adem ishlitishni qet'iy bikar qilip, her qandaq organ we orunning déhqan-charwichilarni heqsiz emgekke sélishini qet'iy chekleydighanliqi bildürülgen.
Buningdin bashqa yene her qandaq birer organning heqsiz adem ishlitishini chekligendin sirt yene kishilerge heqsiz emgek séliqi sélish, jerimane tölitish qatarliq usullarni qollinishimu birdek cheklen'gen.
Inkas qilinishiche, ilgiri yéza-qishlaqlarda, bolupmu Uyghur diyarining jenubidiki yézilarda déhqanlarni mejburiy heqsiz emgekke sélish, heqsiz emgekke chiqmighanlargha qarita jerimane tölitish yaki bashqa xil usullarda jaza qollinish ewji alghan idi. Bu xil mejburi heqsiz emgekke sélish kishilerdiki naraziliq we qarshiliq keypiyatini keltürüp chiqiridighan amillargha aylan'ghan.
Xewerdin melum bolushiche, aptonom rayon da'iriliri mezkur qarargha xilapliq qilip, déhqanlarni heqsiz ishlitish, séliq sélish qilmishi sadir qilghanlarni qanun boyiche jazalaydighanliqini bildürgen bolsimu, emma “Ünümlük tedbir qollinip, yézidiki éshincha emgek küchlirini sirtlargha chiqip ishleshke ilhamlandurush” dep tekitligen.