Ilham toxtining a'ilisidikiler uni yoqlash üchün ürümchige yétip bardi

Uyghurlarning qanuniy heqlirini telep qilip, xitay hökümitining Uyghur siyasitini tenqidligini üchün, bultur da'iriler teripidin “Döletni parchilash, milliy qutratquluq qilish” jinayiti artilip, muddetsiz qamaq jazasigha höküm qilin'ghan meshhur Uyghur öktichisi ilham toxtining a'ilisidikiler uni yoqlash üchün 6-öktebir ürümchige yétip bardi.

Ilham toxtining béyjingdiki ayali güzelnur xanimning radi'omizgha bildürüshiche, ilham toxtining 2-akisi we anisi 6-öktebir küni atushtin ürümchige yétip kelgen. Ular kéler düshenbe yeni 12-öktebir küni türmidiki ilham toxti bilen körüshüsh ruxsetnamisi alghan.

Bu yil7-ayning béshi ilham toxti a'ilisidikiler bilen tunji qétim körüshken.Eyni chaghda uning ayali güzelnur we 2 oghlining ilham bilen körüshüshige peqet 1 sa'etla waqit bérilgen. Körüshüshtin kéyin radi'omiz ziyaritini qobul qilghan güzelnur xanim ilhamning rohi keypiyati yaxshi bolsimu, emma oruqlap ketkenlikini, türme da'irilirining ularning peqet her 6 ayda bir qétim ilhamni yoqlashqa ruxset qilghanliqini bildürgen. Da'irilerning ilham toxtigha xitay qanunida belgilen'gen “Mehbuslar a'ilisidikiler bilen her 3 ayda bir qétim körüshüsh hoquqi” nimu bermesliki xelq'ara kishilik hoquq teshkilatliri we chet'ellerdiki Uyghur teshkilatlirining eyiblishige uchrighan idi.

Xitay merkizi milletler uniwérsitétining iqtisad penliri dotsénti ilham toxti 2014-yili 15-yanwar béyjingdiki öyide tutqun qilinip, bultur 23-séntebir u we uning 8 neper oqughuchisi üstidin höküm chiqirilghan. Eyni chaghda da'iriler ilham toxtining naraziliq erzini ret qilip uni muddetsiz qamaq jazasigha höküm qilghan.