Amérika qelemkeshler jemiyiti ilham toxti qatarliq siyasiy mehbuslarning salametlik ehwalidin endishe qilmaqta

Muxbirimiz irade
2017-11-16
Élxet
Pikir
Hembehr
Print
  • Print
  • Hembehr
  • Pikir
  • Élxet

Xelqara qelemkeshler jemiyitining amérika shöbisi «türmidiki yazghuchilarni xatirilesh küni» munasiwiti bilen élan qilghan eng yéqinqi bir maqaliside uyghur ziyaliysi ilham toxtini eslep ötti.

Bu maqale amérika qelemkeshler jemiyiti «pikir erkinliki» bölümining bashliqi jéymis teygér teripidin yézilghan. U maqaliside xitay hökümitining siyasiy mehbuslarning salametlik ehwalini körmeske sélip, ularning dawalinishigha ruxset bermeslik arqiliq ularni jazalawatqanliqini bayan qilghan. U buninggha yéqinda jiger raki bilen türmide ölgen lyushyawboni shundaqla xitay türmisidiki siyasiy mehbuslardin yang tongyen we ilham toxtilarning salametlik ehwalini misal qilip körsetken.

Melum bolushiche, nobél tinchliq mukapatining sahibi lyu shyawbo türmidin dawalinishqa chiqirilip, qisqighine 21 kündila ölüp ketken. 12 Yilliq qamaq jazasigha höküm qilinghan siyasiy mehbus yang tongyen türmidin dawalinishqa qoyup bérilip 2 aydin kéyin, yeni bu yil 7-Yanwarda ölüp ketken. Uning ailisi 2009-Yilidin buyan uni türme sirtida dawalitish üchün ikki qétim telep sunghan bolsimu, emma ularning telipi ret qilinghan.

Jéymis teygér maqaliside xitay hökümitining ularni axirqi nepisi qalghanda dawalinishqa qoyup bérishi qandaqtur ularning dawalinishi üchün emes, belki peqet «bu mehbuslar türmide ölgen» dégen namgha qalmasliq üchün, dep körsetken. U yene, «bölgünchilik» bilen eyiblinip muddetsiz qamaqqa élinghan uyghur ziyaliysi ilham toxtiningmu türmidiki salametlik ehwalining nacharliqi heqqide melumatlar barliqini, uning türmide körünerlik derijide oruqlap ketkenlikini bayan qilghan we xitay hökümitining siyasiy mehbuslargha tutuwatqan muamilisini qattiq tenqid qilghan. U «xitay hökümitini türmide ölüp ketken siyasiy mehbuslarning biwasite qatili,» dep körsetken.

Toluq bet