Isma'il exmet qatarliq 3 neper yuqiri derijilik Uyghur emeldarning “Ochuq xéti” ni öginish heqqide uqturush tarqitilghan

Muxbirimiz qutlan
2017.07.22

 

Uyghur aptonom rayonluq partkom ishxanisi 7-ayning 21-küni mexsus uqturush chiqirip, jaylarning isma'il exmet, isma'il tiliwaldi we ablet abduréshit qatarliq 3 neper yuqiri derijilik Uyghur emeldarning imzaliq bayanatini öginishini telep qilghan.


Tengritagh torining bu heqtiki xewirige qarighanda, isma'il exmet qatarliq 3 neper Uyghur emeldarning bayanati kériye nahiyisi jay yézisining bashliqi obulqasim mettursunning tunji parche “Ochuq xéti” élan qilin'ghandin buyanqi eng yuqiri derijilik Uyghur emeldarlirining siyasiy bayanati hésablinidiken.

Uqturushta mundaq déyilgen: “Memliketlik xelq qurultiyining sabiq mu'awin bashliqi isma'il exmet, memliketlik xelq qurultiyining sabiq mu'awin bashliqi isma'il tiliwaldi we memliketlik siyasiy kéngeshning sabiq mu'awin bashliqi ablet abduréshitlarning imzaliq maqalisi partiye tarixini eslesh, partiyige minnetdarliq bildürüshte ülge körsetti. Shuning bilen birge yene ‛üch xil küch‚ ning epti-beshirisini échip körsitish we pütün aptonom rayondiki her millet kadir ammisini anarning danisidek bir-birige ching baghlap, wetenning birlikini qoghdashta amma arisida intayin chongqur ijtima'iy tesir peyda qildi.”

Isma'il exmetning 7-ayning 11-küni “Tengritagh tori” da élan qilghan “Ochuq xéti” de mundaq déyilgen idi: “Men péshqedem partiye ezasi bolush süpitim bilen hayatimni ‛üch xil küch‚ ke qarshi adaqqiche küresh qilishqa atashni xalaymen.”

Közetküchiler, xitay kompartiyisining obulqasim mettursundek eng töwen derijilik Uyghur emeldardin tartip isma'il exmettek eng yuqiri derijilik Uyghur emeldarghiche “Ochuq xet” élan qildurup, siyasiy ipade bildürüshke sélishi, emeliyette ularning héch bir Uyghur emeldargha ishenmeydighanliqining bir ipadisi, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.