Kishilik hoquq komitétining jenwediki yighinida Uyghur balilirining hoquqi tilgha élindi

Muxbirimiz irade
2013.09.26

Birleshken döletler teshkilatining 24-nöwetlik kishilik hoquq omumiy yighinining xitaydiki balilar hoquqi mesilisi boyiche échilghan yighinda Uyghur balilirining mesilisi tilgha élindi.

Kishilik hoquq komitéti jenwediki yighinning peyshenbe künidiki kün tertipi boyiche xitaydiki balilar hoquqi mesilisige qarap chiqqan bolup, yighin'gha herqaysi kishilik hoquq organlirining 40 tin artuq wekili közetküchi süpitide qatnashqan. Xitay hökümiti bolsa yighin'gha jem'iy 42 wekil bilen qatnashqan.

Kishilik hoquq komitéti öz tor bétide bergen xewiridin melum bolushiche, yighinda b d t wekili xitaydiki balilar hoquqini qoghdashta saqliniwatqan yétersizlikler üstide özlirining endishilirini bayan qilip ötken. Ular aldi bilen xitayning özining kishilik hoquq jümlidin balilar hoquqini qoghdashqa a'it resmiy bir qanuniy yoqluqini eskertip, buni xitaydiki balilarning hoquqini kapaletke ige qilishtiki zor bir boshluq, dep körsetken.

B d t wekili xitaydiki az sanliq millet balilirining hoquqliri üstide toxtalghanda Uyghur we tibet balilirini alahide tilgha élip, xitaydiki Uyghur we tibet balilirining milliy kemsitilishke uchrawatqanliqini, hökümetning buninggha jiddiy qarap tedbir élishi kéreklikini bildürgen.

Yighinda yene, xitaydiki méyip balilarning kemsitilishi, ata-anisi ölüm jazasigha höküm qilin'ghan balilarning turmushigha kapaletlik qilish, bala sodisi, balilarning zorawanliqqa uchrishigha oxshash bir qatar mesililer tilgha élinip, b d t ning xitaydiki balilarning weziyitidin endishe qiliwatqanliqi bayan qilin'ghan.

Xitay hökümet wekilliri bolsa xitayning dölet ehwaligha asasen balilar hoquqini yaxshilash jehette bir qatar xizmetlerni ishligenlikini we muhim netijilerni qolgha keltürgenlikini ilgiri sürgen. Ular, xitayda balilarning sehiye we ma'arip xizmetliridin behrimen bolushigha kapaletlik qilin'ghanliqini, az sanliq millet balilirining alahide yardemdin behrimen boluwatqanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.