“Uyghur kishilik hoquq qurulushi” Uyghur siyasiy mehbuslar mesilisi boyiche bayanat élan qildi
2014.10.15
Washin'gtondiki “Uyghur kishilik hoquq qurulushi” bügün bayanat élan qilip, xelq'ara jem'iyetni Uyghur siyasiy mehbuslirining teqdirige jiddiy köngül bölüshke hemde Uyghurlar wetinidiki jiddiy weziyetke yéqindin diqqet qilishqa chaqirdi.
Bayanatta Uyghur siyasiy mehbuslirining tizimliki bérilip, xelq'ara jem'iyetning “Dunya kishilik hoquq xitabnamisi” diki tüp prinsiplar boyiche xitay hökümiti yürgüzüwatqan basturush siyasetlirige qarshi jiddiy tedbir qollinishini telep qilghan.
“Uyghur kishilik hoquq qurulushi” ning mezkur bayanati, ularning xitay re'isi shi jinpinggha yollighan ochuq xéti bilen ulan'ghan. Insan heqliri we démokratiyini himaye qilidighan kishilerning mezkur ochuq xetke imza qoyushi chaqiriq qilin'ghan.
Bayanatta ilham toxti, gülmire imin, nurmuhemmet yasin, ekber imin, abdukérim abduweli, alimjan hémit, abduweli ayup we ablikim abdurehim qatarliq 8 neper Uyghur siyasiy mehbusning nami nuqtiliq tilgha élin'ghan.
Amérika Uyghur jem'iyitining re'isi alim séytof bu heqte munularni bildürgen: “Mezkur doklat xelq'ara jem'iyetning xitaydiki eqelliy insan hoquqliri, jümlidin sözlesh erkinliki depsende qiliniwatqan Uyghurlargha yardem qolini sunushigha yol achqusi. Shunga men her bir erkin kishining uninggha imza qoyushini, bu arqiliq xitay re'isi shi jinpinggha xelq'ara jem'iyetning Uyghurlargha köngül bölüwatqanliqini uqturushini tewsiye qilimen!”