Кишилик һоқуқ көзитиш тәшкилати хитайниң тәкшүрүш вә тәқиб қилиш қанунини өзгәртишкә чақирди

Мухбиримиз әркин
2017.11.10

6‏-Ноябир күни хитай мәмликәтлик хәлқ қурултийиниң қанун комитети интизамға хилаплиқ қилған кадирларни тәкшүрүш-тәқипләш һәққидики йеңи қанун лаһийәсини елан қилған иди. Бирақ мәзкур қанун лаһийәси хәлқара кишилик һоқуқ тәшкилатлирида әндишә қозғиди. Кишилик һоқуқни көзитиш тәшкилати 10‏-ноябир баянат елан қилип, хитай мәмликәтлик хәлқ қурултийиниң бу қанун лаһийәсигә дәрһал өзгәртиш киргүзүшини тәләп қилди.

Мәзкур қанун лаһийәсидә хитайниң йеңи қурулған мәмликәтлик хиянәтчиликкә қарши туруш оргини болған тәкшүрүш вә тәқипләш комитетиниң һоқуқи вә фонкитсийәси шәрһләнгән болуп, бу органниң 2018‏-йили 3‏-айдин башлап ишқа киришидиғанлиқи қәйт қилинған иди.

Кишилик һоқуқни көзитиш тәшкилатиниң билдүрүшичә, бу қанун лаһийәсидә тутқунларниң адвокати вә аилиси билән көрүшүшигә капаләтлик қилинмиған. Униңда бу алаһидә органниң тутқунларни 6 айғичә мәлум мәхпий орунда тутуп турушиға йол қоюлған.

Интизам тәкшүрүш комитетлириниң “интизамға хилаплиқ қилди,” дәп қаралған кадирларни узун мәзгил мәхпий тутуп туруши кишилик һоқуқ тәшкилатлириниң изчил тәнқидигә учрап кәлгән иди. Кишилик һоқуқни көзитиш тәшкилати баянатида әгәр бу қанун мақулланса хитайниң чирикликкә қарши туруш һәрикити компартийәниң техиму қаттиқ контрол қилишиға учрайдиғанлиқини билдүргән.

Баянатта мәзкур тәшкилатниң асия ишлири директори софийә ричардсонниң сөзи нәқил кәлтүрүлүп, “бу хитайниң чирикликкә қарши туруш чапармәнлиригә кишиләрни айларчә тутуп туруп, уларни мәҗбури иқрар қилдуруши вә башқа зиянкәшликләрни қилишиға йол ечип бериду,” дейилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.