Moskwadiki Uyghurlar iptar pa'aliyiti ötküzdi

Rusiye musulmanlirining dini bashqarmisi teripidin 30 künlük ramzan éyida her yili ötküzülüp kéliwatqan kolléktip iptarlishishni meqset qilghan “Ramzan chédiri” dep atalghan pa'aliyettin rusiye musulmanliri qatarida Uyghurlar üchünmu mexsus nöwet ayrilghan.

Rusiye ijtima'iy alaqe wasitiliri, jümlidin “Uyghur todey” torining xewiride körsitilishiche, 13-iyun küni moskwa shehiridiki meschit yénigha tikilgen ramizanliq chédirda iptar bérish pa'aliyiti mexsus moskwa Uyghurliri teripidin uyushturulghan bolup, shu künki iptarliq pa'aliyet Uyghur medeniyiti we Uyghurlarni tonushturushni meqset qilghan kechlik pa'aliyet sheklide ötken.

Iptar pa'aliyiti dawamida yene “Moskwa we sankit-pétérburg Uyghurlirining milliy medeniyet birleshmisi” ning re'isi refqet sadiqof we bashqilar söz qilip, Uyghurlarning tarixi, medeniyiti we nöwette Uyghur diyarida uchrawatqan diniy-siyasiy weziyetliri heqqide qisqiche toxtalghan. Moskwa shehiri muftisi Ildar aliyadinof pa'aliyet uyushturghuchilirigha rehmet we tebriklirini bildürgen.

Murasimda yene bishkektin kelgen Uyghur naxshichi we sazendiler Uyghurche milliy naxsha-muzikilirimu orundighan. Bu qétimliq iptar pa'aliyitige moskwada yashaydighan Uyghurlardin bashqa yene her millet ahalisidin 500 etrapida kishi qatnashqan. Moskwa Uyghurliri ötken yilidiki ramizandimu shu xilda bir qétim chong kölemde pa'aliyet ötküzgen idi.

Moskwa we sankit-pétérburg Uyghur mili medeniyet birleshmisining re'isi refqet sadiqofning bildürüshiche, moskwa shehiridiki Uyghurlarning sani texminen 500 din artuq bolup, hazir pütün rusiyede 5 mingdin artuq Uyghur ahalisi tarqaq yashimaqta.