Тайландтин қечип өткән уйғурлардин бир киши малайшияда тутулуп қалған

Мухбиримиз әркин
2017.11.23

Малайшия даирилири пәйшәнбә күни тайландниң садав мусапирлар мәркизидин қечип чиқип малайшияға өтүп кәткән уйғур мусапирлиридин бир кишини тутқанлиқини елан қилған.

Фирансийә агентлиқиниң хәвәр қилишичә, малайшияниң тайланд билән чегридаш кеда штатиниң сақчи башлиқи асри юсуф уйғур мусапирниң садав чеграсиға йеқин җайда тутулғанлиқини билдүргән. Асри йүсүф фирансийә агентлиқиға бәргән учурида “30 яшлардики тутқун малайшия-тайланд чеграсиға йеқин букет таңга дегән йәргә меңип киргән.... Униң әһвали яхши, биз уни тайландқа қайтурушқа һәпилишиватимиз,” дегән.

Тайландниң малайшияға чегридаш садав базиридики тутуп туруш мәркизидә 2-3 йилдин бери тутуп турулуватқан уйғурлардин 20 киши 20‏-ноябир таң сәһәрдә қачқан иди. Тайланд сақчи даирилири сәйшәнбә күни уйғур мусапирлиридин 5 кишиниң тутулғанлиқи, лекин 15 кишиниң малайшия тәрәпкә өтүп кәткәнликини билдүргән.

Уйғур тәшкилатлири малайшия даирилириниң чеградин өткән уйғурларни тайланд яки хитайға қайтурмаслиқини, уларға сиясий панаһлиқ тиләш пурсити яритип беришни тәләп қилип, хәлқара җәмийәтни уларға ярдәм беришкә чақирған иди. Тайланд һөкүмити 2013‏-вә2014‏-йиллири хитайниң сиясий бесмидин қечип тайланд арқилиқ түркийәгә маңған нурғун уйғур мусапирлирини тутқун қилған. Уларниң бир қисминиң түркийәгә кетишигә йол қойған болсиму, бирақ йәнә бир қисмини хитайға өткүзүп берип, б д т мусапирлар мәһкимиси вә кишилик һоқуқ тәшкилатлириниң тәнқидигә учриған. Тайланд б д т мусапирлар әһдинамисигә хилаплиқ қилиш билән әйибләнгән иди.

Малайшия сақчи башлиқи асри юсуфиң фирансийә агентлиқиға билдүрүшичә, пәйшәнбә күни тутулуп қалған уйғур мусапирни йәрлик бир бир киши сақчиға мәлум қилип қойған. Асри юсуф, сақчи тәрәпниң чегра бойида көзитишни күчәйткәнлики вә коча-койларға қачқунларниң рәсимини тарқатқанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.