Tayland musapirlar merkizidin qachqan uyghurlardin yene ikki nepiri tutulup qalghan

Muxbirimiz erkin
2017-11-23
Élxet
Pikir
Hembehr
Print
  • Print
  • Hembehr
  • Pikir
  • Élxet

20‏-Noyabir küni taylandning songkila ölkisi sadaw chégra baziridiki musapirlarni tutup turush merkizidin qachqan uyghur musapirliridin yene ikki nepiri bügün tayland da'irilirige tutulup qalghan. 20‏-Noyabir tang seherde sadaw musapirlar mezkiride tutup turuluwatqan uyghur musapirliridin 20 kishi tayland da'irilirining ularni uzun mezgil tutup turushi we xitaygha qayturup bérishidin ensirep qéchip ketken idi.

Ularning musapirlar merkizidin qéchishi bilen kishilik hoquq teshkilatlirining diqqiti taylandtiki 50-60 dek uyghur musapirining teqdirige buralghan. Tayland da'iriliri seyshenbe küni qachqan uyghur musapirliridin 5 kishining tutulghanliqi, qalghan 15 kishining malayshiya terepke ötüp ketken bolushi mumkinlikini ilgiri sürgen idi. Biraq "bangkok pochta géziti" ning peyshenbe küni xewer qilishiche, qéchip ketken 15 uyghur musapiridin ikkisi bügün sadaw baziri etrapida tutulup qalghan.

Xewerde yerlik kishilerning bayan qilishiche, bu ikki neper uyghur chégra boyigha jaylashqan bir yézining etrapidiki janggalliqqa yoshurun'ghan bolup, bügün etigende janggalliqtin chiqip yézigha yémeklik sorap barghanda tutulup qalghan. Rayonluq saqchi idarisining bashliqi bumpas karnuy "bangkok pochta géziti" ge bergen uchurida ularning birining 22 yashta yene bir 24 yashta ikenliki, ularning sadaw saqchi ponkitigha tapshurup bérilgenliki bildürülgen.

Tayland kishilik hoquq teshkilatlirining bildürüshiche, sadaw musapirlar merkizige 25 uyghur musapir qamalghan bolup, ulardin 5 nepirining salametlik ehwali éghir bolghachqa, qalghan 20 kishi bilen teng qachalmighan iken. Tayland "xelqlerni hoquqlandurush" namliq kishilik hoquq teshkilatining diréktori shalida sajoro'énsuk charshenbe küni muxbirimizgha bergen uchurida, ularni dawalashqa képillikke qoyup bérishni telep qilghanliqini bildürgen idi.

Toluq bet