Хитай даирилири үрүмчидики ресторанларниң “мусулманчә” бәлгиси есишини чәклиди

Мухбиримиз әркин
2017.12.12

Хитай даирилири дүшәнбә күни уқтуруш чиқирип, үрүмчидики ресторанларниң рухсәтсиз есилған барлиқ “мусулманчә” бәлгилирини елип ташлашқа буйруған.

Хитай “йәр шари вақти гезити” ниң хәвиридә көрситилишичә, үрүмчи шәһириниң мәзкур уқтуруши “диний бәлгиләрни ишлитишни қаидиләштүрүп, сахта һалал йемәкликләрни тосуш, һәқиқий һалал йемәкликләрни қоғдашни мәқсәт қилған ” икән. Бирақ “һиндистан вақти” гезити сәйшәнбә күни тарқатқан бу һәқтики хәвәрдә мутәхәссисләрниң сөзини нәқил кәлтүрүп, бу уқтуруш кишиләрниң күндилик һаятидики диний символларни азайтишни мәқсәт қилған, дәп қариливатқанлиқини тәкитлиди.

“йәр шари вақти гезити” ниң хәвиридә көрситишичә, йәрлик даириләр ресторанлардин хитай ислам җәмийитиниң өлчимигә тошмиған барлиқ “мусулманчә” бәлгә вә хәтләрни елип ташлашни, барлиқ “мусулманчә” бәлгиләр хитай ислам җәмийити тәрипидин тәстиқлиниши керәкликини билдүргән. Хәвәрдә, үрүмчи шәһиридики бир алақидар һөкүмәт хадиминиң сөзи нәқил кәлтүрүлүп, “һалал бәлгиләр ислам җәмийити тәрипидин тарқитилиду вә һәр бир бәлгиниң номури болиду” дейилгән. Бу әмәлдарниң илгири сүрүшичә, пәқәт ислам җәмийитиниң мусулманчә йемәкликләр өлчимигә тошқан ресторанларниңла бу бәлгини есишиға йол қоюлидикән.”

Мәзкур бәлгилимә хитай даирилириниң уйғур аптоном районида диний китаб, символларни чәкләп, намаз оқуш, роза тутуш, закат бериш, һәҗ қилиш вә башқа дини паалийәтләргә қаттиқ чәклимә қойған, хилаплиқ қилғанларни қаттиқ җазалап, миңлиған, он миңлиған уйғурни йепиқ тәрбийиләш мәркәзлиригә йиғивалған бир мәзгилдә чиқирилған. Хитай һөкүмити өзиниң бу һәрикәтлирини диний ашқунлуққа қарши туруштики зөрүр тәдбирләр, дәп тәкитлисиму, бирақ уйғур тәшкилатлири униң һәрикити уйғурларниң диний етиқадини аҗизлаштурушқа қаритилғанлиқини илгири сүрүп кәлди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.