Bügün 12‏-dékabir oqughuchilar herikitining 32‏-yilliqi xatire küni

Muxbirimiz erkin
2017.12.12

Seyshenbe küni 1985‏-yili 12‏-dékabir küni partlighan Uyghur aptonom rayonidiki aliy mektep oqughuchilirining démokratik herikitining 32 yilliq xatire küni. Buningdin 32 yil muqeddem Uyghur rayonidiki her qaysi aliy mektep oqughuchiliridin zor sanda kishi namayish qilip, xitay da'irilirining démokratik saylam élip bérishi we aptonomiye qanunigha emel qilishini telep qilghan.

Oqughuchilar 6 türlük telepni otturigha qoyup, xitay da'irilirining buninggha emel qilishini telep qilghan.

Shu chaghdiki oqughuchilar herikitining yétekchiliridin hazir amérikada yashawatqan pa'aliyetchi nurmemet musabay ependi seyshenbe küni mezkur weqeni xatirilep: “Biz shu chaghda otturigha qoyghan teleplirimizning ehmiyitini öz waqtida chongqur chüshinip yetmigen idim. Biraq Uyghur ilining hazirqi weziyitidin qa'irsaq shu chaghdiki teleplirimizning qanchilik muhim we ehmiyitining qanchilik zor ikenlikini hés qilimen”dédi. “12‏-Dékabir weqesi”de oqughuchilar yadro sinaqlirini toxtitish, muhitni qoghdash, xitay köchmenlirini yötkeshni toxtitish, pilanliq tughutni bikar qilish, milliy ma'aripni tereqqiy qildurush, démokratik saylam élip b érish we aptonomiye qanunlirigha emel qilish qatarliq teleplerni otturigha qoyghan.

Shu qétimqi namayishqa yétekchilik qilghan yaki uningda aktip rol oynighan oqughuchilar kéyinki künlerde chet'eldiki Uyghur herikitining awan'gart küchlirige aylan'ghan. Nöwette bu oqughuchilardin nurmemet musabaydin bashqa memet toxti, tursun nurdin, xélil, roshen abbas.......Qatarliq nurghun kishiler amérika, kanada we yarwopa ellerde olturaqliship, özlirining herikitini dawamlashturup keldi.

“12‏-Dékabir weqesi” xitay hökümitining ishikini chet'elge échishqa bashlap, gherb we islam dunyasi bilen bolghan munasiwitini yaxlashilashqa, Uyghurlargha qaratqan siyasitini melum derijide yumshitip, ularning qismen hoquqlarni ishlitishige yol qoyuwatqan mezgilde partlighan idi. Xitay hökümiti namayishni qoralliq basturmighan bolsimu, emma ularning qoyghan teleplirige maqul bolmighan. Namayishtin kéyin Uyghur rayonidiki aliy mekteplerni keng kölemlik siyasiy öginishke uyushturup, namayish yétekchilirini teqib qilghan. Bezi namayish yétekchilirini oqush püttürgendin kéyin töwen'ge heydigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.