Donald tramp eyibligen pakistan'gha xitay chapan yapti

Melum bolushiche, pakistan hökümitining afghanistan-pakistan chégrasidiki bezi rayonlarda pa'aliyet qiliwatqan talibanning qalduq küchlirige qarita yéterlik heriket qollanmaywatqanliqi seweblik, amérika prézidénti donald tramp pakistanni eyibligen. Emma, kona ittipaqdishi bolghan xitay hökümiti otturigha chiqip pakistan üchün söz qilip ulargha chapan yapqan.

Birleshme agéntliqining bügünki xewiride éytilishiche, donald tramp amérika hökümiti testiqlighan nechche milyard amérika dolliriliq térrorluqqa qarshi turush meblighi pakistan'gha ghayet zor menpe'et élip kelgen bolsimu, pakistanning bu menpe'etlerge wijdanen jawab qayturmighanliqini alahide tekitligen. U bu heqte söz qilip “Biz pakistan'gha milyardlap dollar bériwatqan bolsaqmu, biz yoqatmaqchi bolghan térrorchilar pakistanda panahlinip yürmekte hemde xelqimizni öltürüshni dawam qilmaqta. Biz emdi buninggha dawamliq sewri qilalmaymiz” dégen.

Xitay tashqi ishlar ministirliqining bayanatchisi xu'a chünying buninggha jawaben pakistanning eng aldinqi septe orun turup térrorluqqa qarshi küresh qiliwatqanliqini, bu jehetlerde “Zor netijilerni qolgha keltürüp, köp qurban bergenliki” ni tekitligen. U bu heqte toxtilip “Xelq'ara jem'iyet pakistanning térrorluqqa qarshi küreshtiki ejrige köz yumuwalmasliqi lazim, dep qaraymiz” dégen.

Roytéris agéntliqining bu heqtiki xewiride éytilishiche, xitay bilen pakistan izchil halda “Qedinaslarche dostluq” munasiwitini dawam qilduruwatqan memliketler iken. Hazir xitay hökümiti pakistan, afghanistan qatarliq jaylardiki islam qoralliqlirining Uyghurlar rayonidiki zorluq heriketliri bilen munasiwet qurushining aldini élish üchün pakistan bilen birlikte küresh qilmaqta iken.