Xitay yéqin shériki pakistanni aqlashni dawam qilmaqta

Amérika prézidénti donald tramp xitayning yéqin shériki pakistanni “Térrorchilar panahlinidighan jay bolup qaldi” dep eyibligendin béri, xitay arqa-arqilap bayanat bérip, pakistanni aqlimaqta.

Xitayning resmiy axbaratliri tarqatqan xewerlerdin qarighanda, xitay tashqi ishlar ministiri wang yi charshenbe küni amérika dölet ishliri ministiri réks téllérson'gha téléfon qilip, pakistanning afghanistandiki rolining nezerge élinishi, pakistanning igilik hoquqi we bixeterlik endishilirige hörmet qilinishi kéreklikini éytqan.

Roytéris agéntliqining éytishiche, seyshenbe küni xitay tashqi ishlar minsitiri wang yi pakistan tashqi ishlar ministiri téxmina janju'a bilen béyjingda körüshken bolup, uchrishishta wang yi pakistanni radikalliq bilen küresh qilip, “Bir belwagh bir yol istratégiyisi” ning bixeterliki üchün hesse qoshti, dep medhiyiligen. U yene “Nöwettiki murekkep we özgiriwatqan xelq'araliq we rayonluq weziyette pakistan-xitay munasiwetliri téximu muhim rolgha ige” dégen.

Düshenbe küni amérika prézidénti donald tramp pakistan hökümitining afghanistan-pakistan chégrasidiki bezi rayonlarda pa'aliyet qiliwatqan talibanning qalduq küchlirige qarita yéterlik heriket qollanmaywatqanliqini eyibligen we “Biz pakistan'gha milyardlap dollar bériwatqan bolsaqmu, biz yoqatmaqchi bolghan térrorchilar pakistanda panahlinip yürmekte hemde xelqimizni öltürüshni dawam qilmaqta. Biz emdi buninggha dawamliq sewri qilalmaymiz” dégen idi. Arqidinla, xitay tashqi ishlar ministirliqining bayanatchisi xu'a chünying bayanat bérip, “Xelq'ara jem'iyet pakistanning térrorluqqa qarshi küreshtiki ejrige köz yumuwalmasliqi lazim” dep pakistanni aqlighan.