Uyghurlar diyarida pilanliq tughut yéngi siyasiti yolgha qoyuldi

Uyghurlar diyarida yillardin buyan ijra bolup kéliwatqan “Pilanliq tughut siyasiti” de sheherlerdiki Uyghur a'ililiri ikki perzentlik, xitaylar bir perzentlik bolush belgilen'gen bolup, ötken jüme künidin bashlap ijra bolushqa bashlighan yéngi siyaset boyiche, xitay bolmighan milletlerge bérilgen étibar siyasiti bikar qilin'ghan.

Xitayning “Yer shari waqit géziti”de bérilgen bu heqtiki xewerde éytilishiche, yéngi siyaset boyiche buningdin kéyin milliy terkibining qandaq bolushidin qet'iynezer sheher nopusidiki bir jüpning ikki perzentlik, yéza nopusidikilerning üch perzentlik bolushigha ruxset qilinidiken. Xitay hökümitining alaqidar emeldarliri bu heqte söz qilip “Bu yéngi siyaset herqaysi milletlerning hoquqta barawer bolidighanliqini yene bir qétim eks ettürüp berdi” dégen.

Melum bolushiche xitayning “Nur géziti” de 2015-yili élan qilin'ghan bir parche maqalida bu heqtiki mesililer muhakime qilinip “Aptonomiye birla milletning aptonomiyisi emes, aptonomiyelik rayon'gha birla millet igidarchiliq qilidighan ish yoq” dep alahide körsetken idi.

Analizchilar bu yéngi siyasetning ijra qilinishini “Yerlik milletlerge bérilgen aptonomiye hoquqining bikar qilinishqa bashlighanliqining ipadisi, buning bilen Uyghur rayon tewesidiki xitay köchmenlirining nopus sani tézdin köpiyip, yerlik milletlerning sanidin éship kétishige yol achqanliq” déyishmekte.