Waqti ötken tughuttin cheklesh dorisi anarxanni késel qildi

Muxbirimiz méhriban
2013.12.12

Uyghurbiz torining 11-dékabir künidiki xewiride déyilishiche, ili oblasti tékes nahiyisi bostan yézisida olturushluq anar turghunaxun isimlik bir ayal tékes nahiyilik pilanliq tughut xadimliri tarqatqan tughuttin cheklesh dorisini 2008-yili 8-aydin bashlap istémal qilghanliqi seweblik, ménge qan tomuri tosulush késilige giriptar bolghan.

Xewerde bayan qilinishiche, anar xanim nahiyilik pilanliq tughut xadimliri tarqatqan dorini bir mezgil ishletkendin kéyin, uningda éghir derijidiki bash aghrish késili peyda bolghan, 18 künlük dawalashtin kéyin doxturlar uninggha ménge qan tomuri qétishish késilige giriptar bolghanliqini bildürgen. Anar xanim özi istémal qiliwatqan tughuttin saqlinish dorisini tekshürtkinide dorixana bu dorilarning waqti ötkili ikki yil bolghanliqini we bu dorining anar xanimning késilining peyda bolushigha biwasite tesir qilghanliqini bildürgen.

Anar xanim Uyghurbiz tori muxbirigha nöwette pütün bedini qattiq aghréydighan haletke yétip, ishlesh iqtidaridin pütünley mehrum bolghanliqini bildürgen. U yene, eyni chaghda bostan yézisining pilanliq tughut xadimi uninggha tunji qétim bu dorini ichküzgende uni xali jaygha bashlap bérip, bashqilarning yoqluqigha jezm qilghandin kéyin andin ichküzgenlikini we özining sawatsiz bolghanliqi üchün dorining waqti ötken dora ikenlikini bilmigenlikini éytqan. Pilanliq tughut xadimi bolsa, bu dorining waqit cheklimisige diqqet qilmighanliqini bildürüp, mes'uliyettin özini qachurghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.