Қазақистанниң 250 тәк қазақ көчмәнни юртиға қайтуридиғанлиқи илгири сүрүлди

Қазақистан көчмәнләр идариси йеқинда қазақистанниң йешил картиси инавәтсиз қилинған 250 нәпәр уйғур елидин кәлгән қазақларни юртиға қайтуридиғанлиқини елан қилған.

Буниңдин әндишигә чүшкән қазақистанда турушлуқ бәзи оралман қазақлар қазақистан баш министири бақитҗан сағинтайефқа хәт йезип, уларни уйғур елиға қайтурмаслиқни тәләп қилған. Қазақистан ахбарат васитилириниң хәвәр қилишичә, йешил картиси бикар қилинған қазақлар йешил картисини қазақистанниң җамбул областлиқ көчмәнләр идарисиниң башлиқиға пара берип алған икән.

Қазақистан ктк телевизийә қанили илгири җамбул областлиқ көчмәнләр идарисиниң башлиқиниң чәтәллик көчмәнләргә йешил карта сетип парихорлуқ қилғанлиқини хәвәр қилған иди. Қазақистан көчмәнләр идарисиниң хәвәрлиридә көрситилишичә, йешил карта сетивалған 250 нәпәр оралман қазақниң йешил картиси бикар қилинған. Җамбул областлиқ көчмәнләр идарисиниң торида 2‏-өктәбир елан қилинған учурида юқириқи 250 нәпәр қазақниң йешил картиқа илтимас қилиш җәдвилини тоғра тошқузмиғанлиқи, уларниң қазақистандики адресини хата мәлум қилғанлиқи, шу сәвәбтин уларниң йешил картисиниң бикар қилинғанлиқи тәкитләнгән.

Қазақистан 1991‏-йили мустәқиллиқ җакарлиғандин кейин, башқа дөләтләрдики қазақларни қазақистанға көчүп келип олтурақлишишқа чақирған. Шу мунасивәт билән уйғур илидики нурғунлиған қазақлар қазақистанға көчүп чиқип, қазақистан пуқралиқиға өткән яки қазақистанниң йешил картисиға еришкән иди. Қазақистан көчмәнләр идарисиниң билдүрүшичә, йешил картиси бикар қилинған бу қазақлар әгәр уйғур елиға қайтип кетишкә унимиса, қазақистан һөкүмити уларни мәҗбури қайтуридикән.