Xitay qoralliq qisimliri qeshqerde yene heywe körsetken

Muxbirimiz jüme
2017.04.01


Xitay qoralliq qisimliri 31-mart qeshqerning xelq meydanida parattin ötüp heywe körsetken. Xitay axbaratlirida körsitishiche, mezkur heriketke “Heywe qilip chöchütüsh, qoralliq küch körsitish herikiti” dep nam bérilgen. Bu da'irilerning yéqini 45 kün ichide qeshqerde 3-qétim shu xildiki heywe körsitish herikiti élip bérishi.

“Tengritagh tori” ning xewer qilishiche, bu nöwettiki küch körsitish herikiti ilgiridiki heriketlerge oxshimaydiken. Bu heriketke qatnashturulghan esker we muqimliq saqlash aptomobillirining sani köp bolghandin sirt, ular qeshqer wilayetlik partkom aldidin 3 yolgha bölünüp sheher merkizige qarap yürüsh qilghan hemde qeshqer may kinoxanisi doqmushi qatarliq merkiziy yollarda aylinip sho'ar towlighan.

Emma, xewerde heywe körsitish herikitige qatnashturulghan esker we aptomobillarning sani heqqide uchur bérilmigen.

Xitay da'iriliri Uyghur aptonom rayonining térrorluqqa qarishi turush chong yighinini17-féwral qeshqerde achqan we qeshqer xelq meydanigha bir nechche ming etrapidiki qoralliq saqchi qismi, saqchi, xelq eskerliri we ot öchürüsh qisimlirini yighqan. Yighinda Uyghur aptonom rayonning mu'awin partkom sékrétari ju xeylun söz qilip, atalmish “Uchi xil küchlerge üzül-késil zerbe bérish” ni tekitligen idi.

Uningdin bashqa xitay da'iriliri 28-féwral ürümchide 10 ming kishilik herbiy parat uyushturghan we parattin kéyinla qoralliq saqchi qisimlirini qeshqer we xoten qatarliq wilayetlerge yollighan.

Shu küni yoluchilar ayropilani bilen qeshqerge yétip kelgen xitay qoralliq saqchi qisimliri qeshqer xelq meydanigha toplinip qesemyad murasimi ötküzgen idi.

Roytérsning aldinqi küni xewer qilishiche, xitay da'iriliri qeshqerde qatmuqat bixeterlik tedbirliri alghan bolup, hetta yerlik dukandarlarmu künde bir nechche qétim chélinidighan térrorluqqa qarshi agahlandurush signaligha egishishke mejbur iken. Ular térowoga chélin'ghan haman qollirigha kaltek-toqmaqlirini éliship kochigha chiqishidiken we mewhum pichaqliq hujumchigha taqabil turush manéwiri élip baridiken.

Yerliktin radi'omizning igilishiche, bu xildiki bimene tedbirler chén chüen'go Uyghur élige yötkelgendin buyan téximu köpeygen, hetta déhqanlarmu bir qisim kent ishxanilirini saqlashqa orunlashturulghan.

Nöwette Uyghur élide hessilep köpeytilgen we qatmu-qat kücheytilgen bixeterlik tedbirliri heqqide gherb metbu'atlirida bérilgen xewerde xitayning Uyghur élini bir saqchi dölitige aylandurup qoyuwatqanliqini körsitilgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.