“Azadliq radiyosi” ning qirimdiki muxbiri “Bölgünchilik” bilen eyiplinip 22 yilliq qamaqqa késilgen

Muxbirimiz qutlan
2017.09.23

“Azadliq radiyosi” ning rusiye ishghaliyitidiki qirimda turushluq muxbiri mikola séména 22-séntebir küni rusiye da'iriliri teripidin “Bölgünchilik” jinayiti bilen eyiplinip, 22 yilliq qamaqqa höküm qilin'ghan.

Shu küni yawropa ittipaqi bu heqte bayanat élan qilip, “Mezkur höküm axbarat erkinliki, pikir we ipade erkinlikige qilin'ghan éghir derijidiki zorawanliqtur,” dégen. Yawropa ittipaqining chet'el siyasiti bashqarmisimu bu heqte inkas qayturup, “Rusiye qirim yérim arilini qanunsizliq bilen ishghal qiliwalghandin kéyin qirimdiki kishilik hoquq weziyiti barghanséri qiyinlashmaqta,” dégen.

“Erkin yawropa radiyosi” bilen “Azadliq radiyosi” ning bashliqi tomas ként rusiyening bu qilmishini qattiq eyiblep, “Bu jaza rusiye da'irilirining qirimdiki musteqilliq sadalirini tunjuqturush üchün qolliniwatqan oyunlirining bir qismi,” dégen.

Igilinishiche, bu yil 66 yashqa kirgen séména “Azadliq radiyosi” ning ukra'in bölümige qarashliq qirim tarmiqi üchün xewer yazidighan ixtiyariy muxbiri iken. Sot hökümi élan qilin'ghandin kéyin séména, “Men rusiyening adalet we qanun sistémisidin qattiq ümidsizlendim,” dégen.

“Azadliq radiyosi” ning bu heqtiki xewirige qarighanda, moskwa da'iriliri qirimni ishghal qilghandin kéyin qirimdiki rus ishghaligha qarshi küchlerni, bolupmu yerlik qirim tatarlirigha qaratqan basturushni kücheytken. 

2014-Yili qirimliq pa'aliyetchi we filim ishligüchi séntisof rus istixbarati teripidin tutqun qilinip “Térrorluq” jinayiti bilen eyiblen'gen we 20 yilliq qamaqqa höküm qilin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.