Xitay hökümiti Uyghur élida “Qur'an kerim” ni yighiwatqanliqi heqqidiki xewerni inkar qildi
2017.09.28
Xitay tashqi ishlar ministirliqi bügün bayanat élan qilip, Uyghur aptonom rayonida yerlik da'irilerning “Qur'an-kerim”, jaynamaz we bashqa diniy buyumlarni yighiwatqanliqini inkar qilghan.
Xitay tashqi ishlar ministirliqining bayanatchisi lu kang, bügün béyjingda muxbirlarning bu heqtiki so'allirigha jawab bérip, buning “Asassiz” eyiblesh ikenlikini bildürgen.
Halbuki, radi'omiz korlaning qara yulghun qatarliq yéza-bazarliridiki yerlik kadirlirini ziyaret qilip, da'irilerning yerlik musulmanlarni öyidiki “Qur'an -kerim”, jaynamaz qatarliqlarni tapshurushqa mejburlawatqanliqini delilligen idi. Qara yulghunluq bir yéza kadirining bildürüshiche, qarayulghun bazirigha qarashliq bir kentning özidin 5 ming dane “Qur'an kérem” we 250 etrapida jaynamaz yighiwélin'ghan iken.
Xitay tashqi ishlar ministirliqining bayanatchisi lu kang bu heqtiki bayanatida, Uyghur aptonom rayonidiki xelqning tinch-xatirjem yashawatqanliqini tekitlep, “Biz alaqidar tereplerni bundaq asassiz eyipleshler bilen ösek söz tarqitishni derhal toxtitishqa chaqirimiz,” dégen.
Xitay hökümiti 2016-yilning axirliridin bashlap Uyghur aptonom rayonida “Diniy ashqunluqni tügitish” dégen namda yerlik xelqning diniy erkinlikige téximu qattiq cheklimilerni qoyghan. Da'iriler yene Uyghur élidiki diniy simwolluq belgilerni, diniy tüsi qoyuq bolghan isimlarni, diniy mezmundiki eserlerni we diniy xahishni ipadileydighan buyumlarni “Diniy ashqunluqning ipadisi”, dep chekligen idi.