Уйғурлар дияриға ичкиридин сақчи қобул қилиш елани чиқирилди

Мухбиримиз әзиз
2017.12.25

Уйғурлар диярида җиддий давам қиливатқан сиясий буруқтумлуқ вә тәқиб пүтүн дуняға мәлум болуватқан бир пәйттә уйғурлар дияридики һәрқайси шәһәрләрниң ичкири хитай өлкилиридин сақчи вә ярдәмчи сақчи қобул қилиш һәққидә көпләп елан чиқириши диққәт қозғимақта.

Хитай һөкүмити башқурушидики “йәр шари почтиси гезити”ниң 25-декабирдики хәвиригә қариғанда, корла шәһири хебей, шәнши вә сичүән өлкилиридин 1500 сақчи хадими қобул қилидиғанлиқини билдүргән. Шиҗяҗуаң шәһиридә тарқитилған еланда “узун мәзгиллик иҗтимаий муқимлиқни сақлаш үчүн мәзкур елан чиқирилди,” дегән қурлар бар икән. Корла шәһиридики бир сақчи хадиму бу һәқтики соалға җаваб берип, йеңидин қобул қилинған бу сақчиларниң күндилик чарлаш вә пуқралар мулазимити билән мәшғул болидиғанлиқини билдүргән.

Бу хилдики еланларни чиқарған шәһәрләрдин йәнә қаримай, чөчәк, қумул қатарлиқларму бар болуп, даимлиқ сақчилардин башқа йәнә ярдәмчи сақчиларниму қобул қилидиғанлиқини билдүргән. Еланларда “миллий бөлгүнчилик” вә “қанунсиз диний паалийәт” кә қәтий қарши туруш ирадисигә игә болған 18 яштин 35 яшқичә кишиләрниң қобул қилинидиғанлиқи, уларға йәттә миңдин сәккиз миң сомғичә мааш берилидиғанлиқи, һәр йилиниң ахири йәнә 12 миң сом мукапат берилидиғанлиқи ейтилған.

Дәрвәқә, уйғурлар дияриниң юқири пән-техника арқилиқ қаттиқ назарәт қилинидиған “сақчи дөлити” гә айлинип болғанлиқи һәрқайси дуняви ахбарат васитилиридә изчил йәр елип кәлмәктә. Мушундақ әһвалда хитай даирилириниң давамлиқ ичкиридин сақчи қобул қилип уйғурлар диярида тәртип сақлимақчи болушини анализчилар “уйғурлар дияридики вәзийәтниң бундин кейин техиму еғирлишидиғанлиқиниң бешарити,” деди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.