Uyghur élida saqchigha melum qilish üskünisini tokqa chatmighan dukandar jazalandi
2017.05.23
Uyghur élidiki “Xoten géziti” we “Qanunchiliq tor béti” qatarliq uchur menbelirining xewiridin qarighanda, yéqinda shixu shehiridiki bir dukandar dukini ichidiki “Saqchigha melum qilish üskünisi” ni toktin chiqiriwetkenliki üchün “Jungxu'a xelq jumhuriyitining térrorluqqa qarshi turush qanuni” diki alaqidar maddilar boyiche memuriy jazagha tartilghan.
Xewerde éytilishiche, shixu shehiridiki melum bir méwe-chéwe dukinining xojayini jang toksiklitining toki qalmighanliqtin “Bir kunupka bilenla délo melum qilish üskünisi” yaki xitaychide 警报器 dep atiliwatqan üskünini toktin éliwétip, ornigha toksikiltigha tok qachilighan iken. Buning bilen da'iriler uni j x organlirining térrorluqqa qarshi turush xizmetlirige maslashmidi, dep eyiblep, jerimane qoyghan. Bundin sirt, shixu saqchi da'iriliri yene bashqa ikki dukannimu oxshash seweb bilen jazalighan.
“Bir kunupka bilenla délo melum qilish üskünisi” hazir Uyghur élidiki soda-saray, dukan, may qachilash ponkitliri qatarliq orunlargha békitilishi birdek telep qiliniwatqan délo melum qilish üskünisi bolup, u her bir jaydiki “Torlashqan délo melum qilish merkizi” teripidin közitip turulidiken. Uni xalighanche toktin chiqiriwétishke, éliwétishke bolmaydiken.
Chet'ellerdiki közetküchiler yuqiridiki bu ehwalning Uyghur élide “Térrorluqqa qarshi turush” dégen sözning keng da'iride suyi'istémal qilinishidin bashqa yene, teqib we qamalning qattiq kücheygenlikining ipadisi, dep qarimaqta.