Xitay hökümiti Uyghur rayonidiki yerlik a'ililerge shi jinpingning resimini ésish buyruqi chüshürgen

Muxbirimiz erkin
2017.10.02

Xitay hökümiti Uyghur rayonidiki yerlik a'ililerning 1‏-öktebirdin bashlap öyige xitay re'isi shi jinpingning resimini ésishini telep qilghan.

Radi'omiz xitay bölümining xewiride körsitilishiche, bu xitay da'irilirining Uyghur rayonida xitay xelq jumhuriyiti qurulghanliqining 68 yilliqi munasiwiti bilen chiqarghan bir xil yéngi “Wetenperwerlik” tedbiri iken.

Xitay hökümiti 1‏-öktebir küni ürümchi shehiride we Uyghur élining her qaysi nahiye, yéza-kentliride bayraq chiqirish murasimi ötküzgen. Murasimgha puqralar mejburi qatnashturulghan.

Altayning böritoqay nahiyeside olturushluq bir qazaq puqrasining radi'omizgha bildürüshiche, 30‏-séntebir mezkur nahiyege qarashliq her qaysi bashqarma, ahaliler komitéti we yéza-bazarliq hökümetler a'ililerge shi jinpingning resimini tarqitip, her bir a'ilining resimni saray öyining közge chéliqarliq bir yérige ésishni telep qilghan. Bu ehwalni 1‏-öktebir altay wilayitide olturushluq yene bir qazaq puqrasi radi'omizgha bergen uchurida delilligen.

Dunya Uyghur qurultiyining bildürüshiche, xitay hökümiti Uyghur élining altaydin bashqa wilayet-oblastliridimu yerlik ahalilerdin öyige xitayning dölet bayriqi we shi jinpingning resimini ésishni telep qilghan.

D u q bayanatchisi dilshat rishit düshenbe küni radi'omizgha qilghan bu heqtiki sözide, Uyghur élining nurghun rayonlirida “Her bir yerlik millet a'ilisining xitay dölet bayriqi we shi jinpingning resimini ésishi telep qilindi” dégen. U, 1‏-öktebir küni Uyghur élide chong-kichik, qéri-yash, er-ayal hemme Uyghur mejburi bayraq chiqirish murasimigha qatnashturulghanliqi we xitay dölitige sadaqetmenlikini ipadileshke mejburlan'ghanliqini bildürüp, “Bu yéqinqi 40 yil mabeynide misli körülüp baqmighan siyasiy heriket” dep tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.