Хитай таҗикистанға бир милярд 600 милйон доллар мәбләғ селип, алюмин завути қуридикән

Мухбиримиз әркин
2017.11.17

Таҗикистан даирилири җүмә күни хитайниң таҗикистанға бир милярд 600 милйон доллар мәбғәл селип, бир алюмин завути қурудиғанлиқини елан қилди. Франсийә агентлиқиниң илгири сүришичә, бу қурулуш бейҗиңниң оттура асиядики бу тағлиқ дөләткә болған иқтисади тәсири күчийиватқанлиқиниң бишарити икән.

Дөләт игидарчилиқидики таҗикистан алюмин ширкитиниң баянатчиси игор саттароф җүмә күни франсийә агентлиқиға бәргән учурида, таҗикистанниң бу қурулушини йүннән өлкилик қурулуш лаһийәләш гуруһи билән һәмкарлиқта елип баридиғанлиқини билдүргән.

Хитай таҗикистанни қәрз билән тәминлигүчи әң чоң дөләт болуп, униң таҗикистанға бәргән қәрз соммиси таҗикистан ташқи қәрзиниң 50 пирсәнтини игиләйдикән. Франсийә агентлиқиниң билдүрүшичә, хитай узундин бери русийәниң әнәнивий арқа һойлиси дәп қарилип кәлгән таҗикистан билән болған мунасивитини күчәйтишкә тиришип кәлгән икән.

Көзәткүчиләр, хитайниң таҗикистанни уйғур аптоном райониниң муқимлиқ мәсилисидики аҗиз һалқа дәп қарайдиғанлиқини, шуниң үчүн хитайниң таҗикистан билән болған мунасивитини тәрәққий қилдурушқа әһмийәт бериватқанлиқини қәйт қилип кәлгән иди.

Игор саттар, алюмин завутиниң таҗикистанниң ғәрбидики турсунзадә дегән базарда қурулидиғанлиқини, униң йиллиқ ишләпчиқириш иқтидариниң 500 миң тонниға йетидиғанлиқини билдүргән.

Франсийә агентлиқиниң қәйт қилишичә, таҗикистанниң мәзкур райондики алюмин завутиниң йиллиқ ишләпчиқириш иқтидари 500 миң тонна болсиму, бирақ һазир йилиға аран 76 миң тонна алюмин ишләпчиқиралайдикән. Лекин хәвәрдә мәзкур алюмин завути қурулушиниң рагон су еликтир истансиси қурулушиниң пүтүп, йетәрлик ток билән тәминләш-тәминлийәлмәсликигә бағлиқ икәнликини, таҗикистанниң бу қурулушни пүттүрүши үчүн йәнә 4 америка милярд доллириға иһтияҗлиқ икәнликини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.