Da'iriler aqsuda qurulghan “Gumo kitab yurti” ni xitay tarixnamiliri ambirigha aylandurushni pilanlimaqtiken

Muxbirimiz qutlan
2017.05.08

Xitay hökümiti yéqindin buyan Uyghur élidiki wilayet we sheherlerning namlirini arqa-arqidin özgertip, yer-jay namlirini xitaylashturush dolqunini qozghighan.

Xitay taratqulirining xewerlirige qarighanda, burunqi turpan wilayiti emeldin qélip, uning ornigha wilayet derijilik turpan shehiri tesis qilin'ghan. Eslidiki turpan shehiri gawchang rayonigha özgertilgen.

Ilgiriki qumul wilayiti emeldin qaldurulup, uning ornigha wilayet derijilik qumul shehiri tesis qilin'ghan. Eslidiki qumul shehiri yijow rayoni dep özgertilgen.

Da'iriler emdiliktiki qedimini Uyghur élining jenubigha qaritip, aqsu wilayitini emeldin qaldurup, uning ornigha wilayet derijilik sheher tesis qilish, eslidiki aqsu shehirini “Gumo rayoni” dep özgertish pilanini qedemmu qedem élip barmaqtiken.

Aqsu uchur toridin melum bolushiche, aqsu shehiride “Gumo kitab yurti” dégen namda xitay tarixnamilirini yighip saqlaydighan biz zor qedimki kitab ambiri qurulushqa bashlighan.

“Gumo kitab yurti” yéqinda ochuq élan bérip, xitay tarixidiki yilnamiler, tarixiy wesiqiler, ögüt-nesihetler, palnamiler, shé'iriy eserler, kongzi-méngzi telimatliri, xitay klassik hösnxetliri we xitayche uslubtiki resimler hemde xitay tarixnamiliridiki aqsugha da'ir bayanlarni toplashqa bashlighan.

Halbuki, yuqiriqi élanda Uyghurche tarixiy eserler yaki klassik wesiqiler heqqide bir sözmu tilgha élinmighan.

Xitayning yéqinqi siyasiy teshwiqatlirida aqsuning qedimki namining xitay yilnamiliride “Gumo” dep atilidighanliqi heqqide köpligen maqale-xewerler élan qilinishqa bashlighan.

Közetküchiler, da'irilerning aqsu shehiride “Gumo kitab yurti” ni tesis qilishi we bu yerge xitay tarixnamilirini toplishi emeliyette aqsu shehirining namini xitayche “Gumo” gha özgertishning deslepki qedimini éliwatqanliqining béshariti, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.