Taylandta zenjirsiman partlash weqesi yüz bergen

Muxbirimiz shöhret hoshur
2016.08.12

Tayland axbaratining xewer qilishiche, tünügün taylandning jenubidiki bir qisim jaylarda arqa - arqidin partlash weqesi yüz bergen. Qisqighina bir nechche sa'et ichide, xu'a lin, puket, surat we tani qatarliq jaylarda yüz bergen partlashlarda 4 kishi ölgen we köpligen kishi yarilan'ghan.

Tunji partlash peyshenbe küni chüshtin kéyin yüz bergen bolup, peyshenbe kéchidin we jüme etigen'giche dawam qilghan. Melum bolushiche, ölgen we yarilan'ghanlar arisida chet'elliklermu bar.

Tayland saqchiliri bu partlashlarning térrorluq hujumi emeslikini, xelq'ara térrorluq teshkilatliri bilen alaqisi yoqluqini we buning yaman niyette élip bérilghan buzghunchiliq herikiti ikenlikini ilgiri sürgen.

Saqchi terepning bir bayanatchisining éytishiche, bixeterlik tarmaqliri deslepki tekshürüshlerde bu partlashlarning öz - ara munasiwiti barliqini bayqimighan. Emma,

Bir herbiy emeldarning muxbirlargha bildürüshiche, bu partlitish hujumlirida weqe sadir qilish usuli oxshash bolup, bir qétimliq teshkillik hujum dep qarashqa bolidiken. Lékin hujum qozghash meqsiti hazirche éniq emes iken.

Taylandta 2014 - yili 5 - aydiki siyasiy özgirishtin kéyin herbiy hakimiyet textke chiqqan. Ötken hepte herbiy hökümet tüzüp chiqqan asasiy qanun omumiy xelqning awaz bérishige sunulghan.

Bu hujumlarning yéngi asasiy qanun bilen alaqisi bar - yoqluqi tekshürülmekte.

2015 - Yili 17 - awghust tayland paytexti bangkokta partlash hujumi yüz bérip, 20 nechche adem ölgen. Bu weqedin kéyn tayland da'iriliri ikki Uyghurni hujum gumandari dep qolgha alghan we sotqa tartqan, lékin délo téxi qayil qilarliq derijide xulasilenmigen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.