Türkiyede köp sanda ottura asiyaliqlar ishlimekte

Muxbirimiz ümidwar
2017-01-18
Élxet
Pikir
Hembehr
Print
  • Print
  • Hembehr
  • Pikir
  • Élxet

Istanbuldiki réyna kechlik kulubigha qilinghan térrorluq hujumchisining ottura asiyaliq bolushi türkiye metbuatlirida ottura asiyaliqlar heqqidiki melumatlarni we inkaslarni otturigha chiqarmaqta.

Türkiye metbuatliridin «xewer türk» türkiye emgek we ijtimaiy parawanliq ministirliqidin uchur igilep, 2016-Yili türkiyede 73 mingdin artuq chetellikke ishlesh ruxsiti bérilgenlikini xewer qildi.

Ferghane uchur torining türk xewer menbeliri asasida qeyt qilishiche, 2016-Yili türkiyede ishlesh ruxsitige érishkenler ichide ottura asiyaliqlarning sanimu xéli köp iken, qeyt qilinishiche, 3474 neper türkmenistanliq, 1435 özbékistanliq, 3049 qirghizistanliqqa türkiyede ishlesh hoquqi bérilgen.

Lékin, türkiye ottura asiya jumhuriyetlirige wizisiz tüzüm yolgha qoyghanliqi üchün köpligen ottura asiya döletliri puqraliri xalighanche türkiyege kélip melum waqit turush hoquqigha ige iken, qanunluq ishlesh ruxsitige érishkenlerdin bashqa xéli köp salmaqni qanunsiz turup ishleydighanlar igiligen.

Xewerde déyilishiche, 2016-Yili ishlesh ruxsiti alghanlarning eng köpi süriyelikler, uningdin kéyin qalsa gruziyeliklerdur.

Muhim nuqta shuki, mezkur xewerde ötken yili 4397 neper xitay puqrasining ishlesh ruxsiti alghanliqini yazghan bolsimu, emma bularning milliy kimliki heqqide héchnéme déyilmigen.

Melumki, ottura asiyaliqlar eng köp baridighan dölet rusiye bolup, texminen üch milyongha yéqin özbékistanliq, bir milyon etrapida qirghizistanliq we tajikistanliq rusiyede qanunsiz turup we ishlep ailisini qamdimaqta.

Toluq bet