Uyghur amérika jem'iyiti xitayning zorawanliqini qattiq eyiblidi

Uyghur amérika jem'iyiti aqsu “Ayköl qirghinchiliqi” heqqide bayanat élan qilip, xitay hökümitining qolida tömürning sunuqi bolmighan xelqqe oq chiqirip, qanliq weqe keltürüp chiqarghanliqini qattiq eyiblidi we xelq'ara jem'iyetni Uyghur mesilisige köngül bölüshke chaqirdi.

Xitay da'iriliri 7-awghust, yeni bu yilliq roza héyt harpisi aqsuning ayköl yézisi 16-kentide hökümetning yolsizliqigha nazliq bildürgen Uyghurlargha oq chiqirip, az dégende 3 ademni öltürgen we nechche on ademni yarilandurghan idi.

Égilishimizche, naraziliq herikitining yüz bérishige 15-kent ahalisining 16-kenttiki meschitte namaz oqushigha yol qoyulmasliqi seweb bolghan. Naraziliq 4 yashliq qiz sübhinurgha oq tegkendin kéyin, qarshiliq herikitige aylan'ghan.

Teshkilat bayanatida mundaq dédi: xitay hökümitining tinch yosundiki diniy pa'aliyetlerge qanunsiz cheklime qoyushi we saqchilarning zorawanliqi sherqiy türkistanda yene bir qétimliq toqunushqa seweb boldi.

Amérika Uyghur birleshmisi bu qétimqi bayanatida xelq'ara jem'iyetni Uyghur mesilisige köngül bölüshke chaqirip mundaq dédi: biz xelq'ara jem'iyetni xitaygha qaratqan bésimlirini boshashturmay, xitayni Uyghurlargha qaratqan diniy basturush siyasitini toxtitishqa we Uyghurlarni jazagha höküm qilishta ochuq-ashkara bolushqa mejburlashqa chaqirimiz.