Rabiye qadir xanim pakistan hökümitini 3 Uyghur pa'aliyetchini qoyup bérishke chaqirdi

Uyghur milliy herikiti rehbiri rabiye qadir xanim aldinqi küni pakistan hökümitige xitaben bir bayanat élan qilip, tutqundiki 3 neper Uyghur pa'aliyetchini qoyup bérishke chaqirdi.

Pakistan saqchiliri xitayning 19-qurultiyi échilishtin bir we ikki kün burun pakistandiki Uyghur pa'aliyetchilerdin ömer Uyghur, abduqéyum shemshidin we abdughénini tutqun qilghan idi.

“Uyghur kishilik hoquq we démokratiye fondi” ning tor bétide élan qilin'ghan rabiye xanimning mezkur bayanatida ömer Uyghurning aktip kishilik hoquq we medeniyet pa'aliyetchisi؛ abduqéyum shemshidinning bolsa bir heweskar siyasiy mulahizichi, abdughénining ijtima'iy pa'aliyetchi ikenliki tilgha élinip, bularning héchbirining pa'aliyitining pakistan dölet bixeterliki bilen alaqisi yoqluqi eskertilgen. Bu tutqunda shübhisiz halda xitayning qoli barliqi tilgha élin'ghan bayanatta, ömer Uyghurning tutqundin bir ay awwal ömer Uyghur wexpini taqash heqqide pakistan saqchiliri teripidin agahlandurulghanliqi eskertilgen.

Xitay da'iriliri her qétim dölet derijilik yighin we murasimliri dawamida bir türküm sabiq siyasiy mehbuslar we nuqtiliq a'ile ezalirini qamaq élip, bularning bir qismini murasimdin kéyinki qoyup berse, yene bir qismini bahane-sewebler bilen türmige tashlap kéliwatqan idi. Bayanatida bu weziyetni eslitip ötken rabiye qadir xanim, pakistanni özining musteqil bir döletlik obrazini qoghdash üchün bolsimu, xitayning Uyghurlar heqqidiki yolsiz telep we buyruqlirini ret qilishqa, xitayning bir ölkisidek heriket qilmasliqqa dewet qilghan.