Maykil klark: "xitay shinjangda üch xil urushni dawam qilmaqta!"

Muxbirimiz eziz
2017-11-27
Élxet
Pikir
Hembehr
Print
  • Print
  • Hembehr
  • Pikir
  • Élxet

Awstraliye döletlik uniwérsitétining proféssori maykil klarkning namida "sherqiy asiya munbiri" zhurnilida élan qilin'ghan "xitayning shinjangdiki üch xil urushi" serlewhilik maqalida xitay hökümitining uyghurlar diyarida "is-tüteksiz urush" ni qandaq kéngeytiwatqanliqi nuqtiliq muhakime qilin'ghan.

Maqalida körsitilishiche, xitay da'iriliri hazir "jama'et pikri toplash", "psixik urush qozghash" we "qoral ishlitish" qatarliq üch xil urush sheklini uyghurlar diyarida keng kölemde ijra qilmaqtiken. Shuning bilen birge qedimki xitay herbiy alimi sun zining urush desturidiki "düshmenni urushsiz boysundurush" taktikisini qollanmaqtiken. Bu hal xitay re'isi shi jinping "shinjangning muqimliqi pütkül döletning islahat we tereqqiyati üchün hel qilghuch amillarning biri," dep körsetkendin buyan téximu yuqiri pellige kötürülmektiken.

Aptorning qarishiche, xitay hökümiti hazir "psixik urush" ta uyghurlar diyarida "mexsus yollar arqiliq jemiyetke uchur tarqitip," uyghurlarda öz-özige bolghan derguman we wehimilik tuyghusini ashurush؛ "jama'et pikri toplash" ta dölet ichi we sirtidiki jama'et pikrini xitayning ijabiy tereplirige yghzlendürüsh, buninggha qarshi pikirlerni yétim qaldurush؛ "qoral ishlitish" te xelqaraliq we dölet ichidiki qanun maddiliridin paydilinip, xitay hökümranliqining qanunluq ikenlikini namayan qilish usullirini qolliniwétiptu.

Mushu tedbirlerning gireleshme shekilde ijra bolushi tüpeylidin hazir uyghurlar diyarida misli körülmigen bixeterlik tedbirliri we nazaret sistémisi otturigha chiqmaqtiken. Xitay hökümiti bolsa bularni "térrorluqqa qarshi tedbirler" dep izahlimaqtiken.

Toluq bet