Uyghur élidiki muzéylar xitayning siyasiy teshwiqat wasitisige aylanmaqta

Asiya kindiki torining xewirige qarighanda, yéqinda Uyghur aptonom rayonidiki 3 orun yene xitay boyiche “Milletler ittipaqi terbiyisini qanat yaydurushtiki muhim baza” tizimlikige kirgüzülgen.

Melum bolushiche, yéqinda xitay döletlik milletler ishliri komitéti memliket boyiche 30 orunni “4-Qétimliq milletler ittipaqi terbiye bazisi” dep élan qilghan. Bu tizimlikke Uyghur aptonom rayonidin 3 orun tallan'ghan. Ular bortala mongghul aptonom oblastliq muzéxana, aqsu wilayetlik arxipxana we shinjang ishlepchiqirish-qurulush armiyisi 359-brigadisining boz yer özleshtürüsh xatire sariyi iken.

Xewer tépishimizche, buningdin ilgiri Uyghur élida 11 orun bu türdiki tizimlikke kirgüzülgen iken.

Bu ehwal xitay ichi we sirtidiki közetküchilerning diqqitini qozghighan. Ular birdek xitayda muzéy, arxipxana, xatire saray we bashqa medeniyet orunlirining kompartiyening siyasiy teshwiqatliri üchün wasite qiliniwatqanliqini tekitlimekte.