Xitay da'iriliri Uyghur mehbuslarni xitayche sözleshke mejburlighanliqini inkar qildi

Muxbirimiz eziz
2018.01.16

Uyghurlar diyarida siyasiy, iqtisad we bashqa oxshimighan seweblerdin muddetlik we muddetsiz qamaq jazalirigha höküm qiliniwatqan Uyghur mehbuslarning türmidiki mezgilde xitayche sözleshke mejburlinidighanliqi heqqide köpligen inkaslar otturigha chiqqanliqi melum.

Yéqinda xitay da'iriliri türmilerdiki mehbuslarni xitayche yaki xitay ortaq tilida sözleshke mejburlighanliqini inkar qildi. “Yer shari waqti géziti” ning 16-yanwardiki xewirige qarighanda, ürümchidiki xitay da'iriliri özlirining mehbuslarni yaki ularni yoqlashqa kelgen tughqanlirini xitayche sözleshke mejbur qilmighanliqini éytqan.

Türme bashqurushqa mes'ul kadirlardin biri bu heqte söz qilip, “Jenubiy shinjang rayonidikiler ortaq tilni bilmeydu. Eger biz mehbuslarni yaki ularning tughqanlirini ortaq tilda sözleshke mejburlighan bolsaq ular özlirining türmidiki yéqinliri bilen qandaqmu körüshelisun?” dégen.

Uyghurlar diyaridiki xitay türmiliride yétip baqqan bezi Uyghurlar xitay saqchilarning Uyghur mehbuslarni xitayche sözleshke mejburlaydighanliqi, Uyghurche sözligenlirige jismaniy jaza béridighanliqi, buning bilen anche köp ma'arip terbiyesi körmigen bir qisim Uyghur mehbuslarning bihude tayaq yeydighanliqini inkas qilishqan idi.

Bezi analizchilar bu heqte pikir qilip, “Xitay da'iriliri herqachan özlirige paydisiz ré'alliqni inkar qilip kelgen. Ularning Uyghur mehbuslarni xitayche sözleshke mejburlimiduq, dégenliri özini aqlashqa urunushtin ibaret” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.