Uyghurlarning sayahet üchün pasport bijirishiningmu éghir siyasiy cheklimige duch kéliwatqanliqi ashkara bolmaqta

Shiwétsiyediki “Sherqiy türkistan teshwiqat merkizi” yéqinda ashkara qilghan bir höjjetke qarighanda, Uyghurlarning sayahet shirketliri teshkilligen ömek terkibide pasport ishlitishi yenila qattiq kontrol qilinmaqtiken.

Mezkur höjjetni Uyghur élidiki melum bir xelq'ara sayahet shirkiti kucha nahiyelik jama'et xewpsizlik idarisige qaritip chiqarghanliqi melum.

Uningda kucha nahiyesidin mezkur sayahet ömikige qatniship tayland, sin'gapor we malayshiya qatarliq üch döletni sayahet qilmaqchi bolghan melum bir Uyghurning pul töligenlik taloni hemde sayahet shirkitining uning arqa körünüshini tekshürgenliki heqqidiki ispati körsitilgen.

Undin bashqa höjjette yene “Sayahet shirkiti mezkur kishining sayahet mezgilide hejge barmaydighanliqigha kapaletlik qilidu. Sayahet shirkiti yene mezkur kishining pasportini sayahettin qaytip kelgende qayturuwélip saqchi idarisining saqlishigha tapshurup béridu”, déyilgen.

Közetküchiler, mezkur höjjet nöwette Uyghurlarning hetta sayahet üchün pasport béjirish hoquqiningmu bashqa herqandaq milletke qarighanda éghir siyasiy cheklimige uchraydighanliqining bir delili, dep qarimaqta.