Uyghur élining jing nahiye daxéyen bazirida ikki neper diniy zat tutqun qilin'ghan

Muxbirimiz erkin
2017.11.10

Uyghur élining jing nahiyesige qarashliq daxéyen bazirida bu yil ikki neper diniy zatning tutqun qilinip, hazirgha qeder iz dériki yoqluqi ilgiri sürülmekte.

Daxéyen bazirining weziyitidin xewerdar kishilerning peyshenbe küni radiyomizgha bildürüshiche, daxéyen bazirining 9‏-kentide olturushluq qazaq diniy zat murat memetjan bilen daxéyenning uchbulaq charwichiliq meydanida olturushluq sérik qalibék bu yil 5‏-ayda tutqun qilin'ghan iken.

Weqedin xewerdar kishiler radi'omizgha bergen uchurida, 40 yashliq muxter memetjan we 30 yashliq sérik qalibék tutqun qilin'ghandin kéyin, ularning a'ile tawabi'atliri yerlik j x organlirigha bérip, tutqunlarning iz-dérikini sürüshtürgen bolsimu, biraq hazirgha qeder ularning aqiwitige da'ir héchqandaq uchur alalmighanliqini bildürgen. Weqedin xewerdar kishilerning bildürüshiche, saqchi terep tutqunlarning a'ile tawabi'atlirigha ularning tutqun qilinish sewebi, qeyerde tutup turuluwatqanliqi we tutqun qilish ruxsitining bar-yoqluqini körsitishni ret qilghan.

Xitay da'iriliri bu yil 1‏-aydin bashlap Uyghur aptonom rayonida “Diniy esebiylik” we “Ikki yüzlimichilik” ke qarshi turush herikiti qozghap, köpligen dindar ahalilerni we diniy zatlarni “Yépiq terbiyelesh merkezliri” ge yighiwalghan. Yerlik da'iriler ilgiri radiyomizgha ularning ichidiki “Mesilisi bar” dep qaralghan kishilerning qamaq jazasigha höküm qilinip, türmilerge élip kélitidighanliqini bildürgen idi. Emma xitay da'irilirining bu herikiti xelq'ara kishilik hoquq teshkilatlirida endishe qozghighan. Kishilik hoquqni közitish teshkilati bu yil 9‏-ayda bayanat élan qilip, atalmish “Yépiq terbiyelesh merkezliri” ni derhal taqashni, bu yerge qamalghanlarni qoyup bérishni telep qilghan.

Jing nahiyesining weziyitidin xewerdar kishilerning bildürüshiche, bu yil 5‏-ayda daxéyen bazirida yuqiriqi ikki diniy zattin bashqa yene uchbulaq charwichiliq meydanida olturushluq bolat baltabék, 4‏-kentte olturushluq murat qawsén isimlik ikki yash tutqun qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.