Хитай даирилири уйғур райониниң бу йиллиқ “саламәтлик тәкшүрүш” вәзиписини 99 пирсәнт орунлиған

Мухбиримиз әркин
2017.10.20

Хитай даирилириниң уйғур районида елип барған бу йиллиқ омумий хәлқ “саламәтлик тәкшүрүши” 15‏-өктәбир ахирлашқан.

Уйғур аптоном районлуқ сәһийә-пиланлиқ туғут комитетиниң билдүрүшичә, даириләр уйғур райониниң бу йиллиқ омумий хәлқ “саламәтлик тәкшүрүши” дә 18милйон 750 миңдин артуқ адәмниң саламәтликини тәкшүрүп, вәзипини 99 пирсәнт орунлиған. Бу хитайниң уйғур районида елип барған 2‏-нөвәтлик омуми хәлқ саламәтлик тәкшүрүшидур.

1-Нөвәтлик омумий хәлқ “саламәтлик тәкшүрүши” 2016‏-йили сентәбирдә башлинип, бу йил 2‏-айда ахирлашқан. 2‏-Нөвәтлик саламәтлик тәкшүрүши бу йил 7‏-айда башланған иди. Даириләр омумий хәлқ “саламәтлик тәкшүрүши” хәлқниң кесилини ениқлап, уларниң давалинишиға капаләтлик қилишни мәқсәт қилиду десиму, бирақ униң һәқиқий мәқсити бәзи чәтәл көзәткүчилири вә уйғур тәшкилатлириниң гуманини қозғап кәлди.

Уйғур тәшкилатлириниң қаришичә, хитайниң һәқсиз омумий хәлқ “саламәтлик тәкшүрүши” ни йолға қоюштики һәқиқий мәқсити уйғурларниң биологийилик учурини топлап, DNA амбири қуруш, бу арқилиқ уйғурларни контрол қилиш икән. Уйғур районидики бәзи йәрлик аһалиләр илгири радийомизға саламәтлик тәкшүрүши мәҗбури елип берилсиму, бирақ дохтурларниң тәкшүрүш нәтиҗисини өзлиригә ейтип бәрмәйдиғанлиқини билдүрүп, саламәтлик тәкшүрүшигә болған бәзи наразилиқлирини ипадилигән иди.

“шинҗаң гезити” ниң 18‏-өктәбирдики хәвиридә ашкарилишичә, даириләр бу йиллиқ омумий хәлқ “саламәтлик тәкшүрүши” гә бир милярд 585 милйон йүән пул аҗратқан. Хәвәрдә, бу қетим уйғур елиниң җәнубийдики бир област, 3 вилайәттә 9 милйон 80 миңдин артуқ адәм тәкшүрүлүп, тәкшүрүлүш нисбити 99 пирсәнткә йәткәнликини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.