Xitay éléktr énérgiye shirkitining Uyghur iligha meblegh sélish pilani endishe qozghidi
2015.04.17
Xitayning döletlik éléktr transformatsiye shirkitining yéqinda ashkarilishiche, mezkur shirket 2016-yildin bashlap kelgüsi 4 yilda Uyghur iligha 32 milyard dollar meblegh sélip, rayonning tok teqsimat sistémisini serxillashturidiken.
Shinxu'a agéntliqi, mezkur qurulush Uyghur ilidiki éléktr énirigiye asasi eslihelirini xitayning sherqidiki ölkiler bilen zich baghlashni meqset qilghanliqini bildürgen.
Xitay hökümiti 2010-yili chaqirghan “Shinjang xizmet yighini”da “Gherbning tokini sherqqa yötkesh” pilanini otturigha qoyup, Uyghur ilidiki kömür zapisi mol rayonlarda éléktr istansilirini qurush, kömürni öz jayida serp qilip, tokini ichkirige yötkeshni qarar qilghan.
Lékin bu pilan Uyghur kishilik hoquq teshkilatlirida we muhit qoghdighuchi guruhlarda qattiq endishe qozghighan idi. Ularning körsitishiche, kömür kanlirining köplep échilishi, kömür serpiyatining hessilep artishini keltürüp chiqirip, rayonning muhitini éghir bulghaydiken.
Lékin shinxu'a agéntliqining bildürüshiche, xitay döletlik éléktr transformatsiye shirkiti 2020-yiligha qeder Uyghur ilining éléktr énérgiye teqsimat sistémisini xitayning sichüen, chingxey we sherqtiki ölkiler hem chungching shehiri bilen pütünley tutashturup bolidiken.
Lékin d u q bayanatchisi dilshat rishit, bu pilan muhitni weyran qilipla qalmay, köchmenlerni téximu köp jelp qilip, Uyghurlarning xas medeniyet hayati we turmush usuligha téximu éghir tehdit peyda qilidu, dédi.