Roytérs agéntliqi, xitayning Uyghur rayonidiki amanliq tedbirlirining Uyghurlarni bi'aram qiliwatqanliqini xewer qildi

Roytérs agéntliqi jüme küni xewer tarqitip, xitayning Uyghur rayonida alghan qattiq bixeterlik tedbirlirini xelqning amanliqini qoghdash, dep chüshendürsimu, biraq buning Uyghurlarni qattiq bi'aram qiliwatqanliqini bildürdi.

Xewerde qeyt qilishiche, roytérsning bir muxbiri yéqinda qeshqer we xotenlerni ziyaret qilip, qeshqerde “Térrorluq”qa qarshi ötküzülgen xelq manéwiri, xotende ötküzülgen bayraq chiqirish murasimi we diniy terbiye yighinlirigha shahit bolghan.

Xewerde, qeshqerde dukanlargha mejburiy reqemlik bixeterlik ishiki, signal we widé'o kaméra orunlashturulghanliqini, dukan ichidiki widé'o kaméralarning saqchigha yollinidighanliqini alahide eskertip, özining qeshqerde körgen bir kocha manéwirini misalgha alghan.

Muxbirning körsitishiche, qeshqerde her qétim agahlandurush signali chélinsa, qeshqer restiliridiki dukandarlar hökümet tarqitip bergen kalteklirini kötürüp talagha chiqishqa mejburken.

Xewerde yene, qeshqerdiki yerlik tijaretchilerning sözini neqil keltürüp, bu xil amanliq tedbirlirige qeshqer xelqining qattiq naraziliqini bildürgen. Xewerde qeyt qilishiche, qeshqerdiki bir Uyghur tijaretchi roytérsning muxbirigha “Bizning héchqandaq mexpiyetlikimiz qalmidi. Ular sizning hemme ishingizni körüp turushni isteydu” dégen. Xewerde yene, bu yil 5‏-ayda béyjingda bir yol, bir belwagh xelq'ara bashliqlar yighini échilidighanliqini, xitay da'irilirining yighin mezgilide zor kölemlik bir hujumgha uchrashtin endishe qilidighanliqini bildürüp, biraq, chet'el mutexessisliri Uyghur rayonida hemme nersining amanliqqa merkezliship qélishi, béyjingning “Bir yol, bir belwagh ” nishanigha zit, dep qaraydighanliqini ilgiri sürgen.