Xitay musteqil pelestin döliti qurushni teshebbus qilmaqta
2017.04.14
“Isra'iliye waqti”, “Amérika xewerliri” we bashqa axbarat wasitilirining bügünki xewiride éytilishiche 13-aprél küni xitayning tashqi ishlar ministiri wang yi muxbirlarni kütüwélish yighinida “ Pelestinliklerning öz döliti bolmasliqtek tarixiy xataliq tüzitilishi, pelestinlikler jezmen musteqil pelestin döliti qurup chiqishi lazim” dégen.
Melum bolushiche, wang yi béyjinggha ziyaretke kelgen pelestin tashqi ishlar ministiri riyad maliki bilen söhbette bolghandin kéyin yuqiriqi sözni qilghan hemde shu arqiliq xitayning ottura sherqte tinchliq ornitishni arzu qilidighanliqi bildürmekchi bolghan.
Roytérs agéntliqining xewiride éytilishiche, xitay ottura sherqning néfitige zor derijide éhtiyajliq bolsimu, izchil halda ottura sherqtiki diplomatiye pa'aliyetlirige chong tesir körsitip baqmighan iken.
Halbuki, Uyghur analizchilar xitayning bu xildiki “Heqqaniyetchi” siyaqida otturigha chiqishini ottura sherqtiki musulman ellirining qollishini qolgha keltürüsh, shu arqiliq xitay armiyesining Uyghurlarning heq we hoquq küreshlirini qoralliq basturush herikiti qozghighan musulmanlar dunyasidiki naraziliqni peskoygha chüshürüshni meqset qilghan, dep qarawatqanliqi melum.