Xitay dölet ishliri kabinéti “Shinjang medeniyet almashturush” namida amérikigha bir ömek ewetken

Muxbirimiz ümidwar
2017.10.29

Xitay dölet ishliri kabinétining axbarat idarisi teripidin teshkillen'gen “Shinjang medeniyet almashturush wekiller ömiki” dep atalghan bir guruppa ötken hepte amérika qoshma shtatlirigha yétip kélip, aldi bilen téksas shtatidiki xyoston shehiride ikki künlük pa'aliyet élip barghan.

Xitayda tarqitilidighan “China da'ily”, yeni, “Xitay kündilik géziti”, shinxu'a agéntliqi shuningdek yene Uyghur aptonom rayonluq kommunistik partiye komitétining organ metbu'ati bolghan “Tengri tagh” tori qatarliqlar bu heqte xewer tarqatqan.

“Xitay kündilik géziti” ning tepsilatidin melum bolushiche, xitay dölet ishliri kabinétining kishilik hoquq ishxanisining mu'awin bashliqi zu féng yétekchilikidiki mezkur ömek xyoston shehirige jaylashqan asiya jem'iyitining téksas merkizi we téksastiki saynt tomas uniwérsitéti qatarliq ikki orunda shu jaydiki bir qisim mutexessisler bilen söhbet ötküzgen hem shu jaydiki xitay muhajirliri bilen uchrishish ötküzgen. Ular bu pa'aliyetliride xitayning Uyghur diyarigha qaratqan dini, milliy we iqtisadiy tereqqiyat siyasetlirini tonushturghan. 

Xitay merkizi hökümitining axbarat wasitisi bolghan “Xitay kündilik géziti” in'glizche xewiridin melum bolushiche, ömek bashliqi, xitay dölet ishliri kabinéti kishilik hoquq ishxanisining mu'awin bashliqi zu féng asiya jem'iyitining téksas merkizide ötküzülgen söhbet yighinida özlirining amérikigha kélishidiki meqsitining amérikidiki her qaysi saheler, bolupmu ilim sahesidikiler we ammining “Shinjang aptonom rayonini” chüshinishini ilgiri sürüsh we medeniyet almashturush ikenlikini bildürgen. 

Amérikida xitay tilida tarqitilidighan bezi uchur wasitiliridin melum bolushiche, xitay merkizi hökümiti teshkilligen mezkur besh kishilik “Xitay shinjang medeniyet almashturush ömiki” terkibidin alimjan yasin isimlik bir Uyghur orun alghan. 

Xitayning mezkur “Shinjang medeniyet almashturush ömiki” xyoston'gha yétip kélip, xitayning Uyghur aptonom rayonidiki dini, milliy we kishilik hoquq we iqtisadi tereqqiyat siyasetliri teshwiqatini bashlighan, 26-öktebir küni amérika qoshma shtatliri dölet mejlisining tom lentos kishilik hoquq komitéti mexsus Uyghurlarning kishilik hoquq, dini we siyasiy hoquq weziyiti hetta chet'ellerdiki Uyghurlarningmu hetta xitayning bésimigha uchrash ehwali qatarliq mesililerde guwahliq bérish yighini uyushturghan bolup, bu yighin'gha mezkur komitétning re'isliri, amérika awam palatasining ezaliridin jéymis mekgawérn we randiy xaltgrén yighin'gha riyasetchilik qilghan idi.

Xitay hökümiti teshkilligen mezkur ömek nyuyork shehiri we kanadaning toronto, ottawa qatarliq sheherliride oxshash xildiki pa'aliyetlirini dawamlashturidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.