Xitay da'irilirining chet'ellerdiki démokratik küchlerge qaratqan bésimining kücheygenliki ilgiri sürülmekte

Chet'ellerdiki kishilik hoquq pa'aliyetchiliri xitay da'irilirining gherb dunyasi we chet'ellerdiki démokratik küchlerge qaratqan bésimining kücheygenlikini ilgiri sürmekte.

18-Öktebirdin 21-öktebirgiche kanadada échilidighan “6-Nöwetlik xitay we asiyaning démokratiyilishishini qollash yighini” ning teshkilligüchiliridin shéng shö, firansiye radi'osining ziyaritini qobul qilip, xitay da'irilirining nöwette chet'ellerdiki Uyghur, tibet, mongghul pa'aliyetchiliri we xitay démokratlirigha qaratqan bésimni barghanche kücheytiwatqanliqini hetta gherb démokratik döletlirige bésim ishlitip, xitaygha qarshi démokratik teshkilat we shexslerning pa'aliyetlirini chekleshke mejburlawatqanliqini bildürgen.

Shéng shö sözide,Uyghur teshkilatlirining pa'aliyetliri birqeder janliniwatqan döletlerde,yéqindin buyan xitay da'irilirining bésimi kücheygenlikini bildürüp, gherb démokratik döletliri we kishilik hoquq teshkilatlirining bu mesilige jiddiy qarishi kéreklikini bildürgen.

Shéng shö bu yil 5-ayda türkiyening istanbul shehiride échilmaqchi bolghan“Uyghur mesilisi heqqidiki xelq'ara muhakime yighini” we 30-maydin 1-iyun'ghiche wén'giriyede échilmaqchi bolghan dunya Uyghur yashlar qurultiyi qatarliqlarning xitay hökümitining bésimi seweblik shu döletlerdiki melum organlar teripidin bikar qilin'ghanliqini misal qilip körsetken.