Aqsaray xitayning chet'el muxbirlirigha qaratqan mu'amilisidin qattiq ümidsizlen'genlikini bildürdi

Amérika aqsaray da'iriliri peyshenbe küni xitayning chet'el muxbirlirigha qaratqan mu'amilisidin qattiq ümidsizlen'genlikini bildürdi.

Amérika aqsaray da'irilirining mezkur bayanati “Nyu - york waqit géziti” muxbiri awsitin ramziy wizisini uzartalmay xitaydin ayrilishqa mejburlan'ghan mezgilde élan qilindi.

Aqsaray bayanatchisi jey karnéy: biz ramziy ependi we bashqa bir nechche amérika muxbirlirining xitaydiki wizisi yaki muxbirliq ruxsetnamisini uzartish üchün nechche aylap, hetta bezide yillap saqlighanliqidin bekmu ümidsizlenduq.

U yene :xitay muxbirlarning xizmitini erkin qilishigha cheklime qoymasliqi kérek, dédi we xitayni shu xilidiki belgilimilirini bikar qilishqa jarqiridi.

Ramziy ötken 13 ay ichide xitaydin mejburiy chiqiriwétilgen ikkinchi amérika muxbiri.

2012 - Yili xitayning sabiq bash ministiri wén jyabawning mexpiy bisati heqqidiki xewer “Nyu - york waqit géziti” de ashkarilan'ghandin kéyin, xitay da'iriliri “Blumbérg” we “Nyu - york waqit géziti” ning xitayda turushluq muxbirlirigha qaratqan wiza cheklimisini kücheytken.

Bu amérika hökümitining naraziliqini qozghighan.

Jow baydin ötken ay xitayni ziyaret qilghanda mezkur mesilini xitay re'isi shi jinpingning aldigha qoyghan we eger xitay mushundaq qiliwerse buning yaman aqiwet keltürüp chiqiridighanliqini agahlandurghan.

Shundin kéyin xitay “Blumbérg” we “Nyu - york waqit géziti” muxbirlirining wiza resmiyetlirini béjirip bergen idi.