Уйғурлар дияридики хитай әмәлдарлар бейҗиңдики “орда күриши” ниң қурбанлриға айланмақта
2017.04.12
“бүйүк ера” ториниң бүгүнки хәвиридә ейтилишичә уйғурлар дияридики юқири дәриҗилик бирнәччә әмәлдар, җүмлидин олтурақ өй вә шәһәр-йеза қурулуши назаритиниң партком секретари ли җйәншин, аптоном районлуқ теббий университетниң секретари ли бин қатарлиқлар “хизмәттики қулайлиқтин пайдилинип зор миқдарда пара йегән” дегән әйибләшләр билән 10 йиллиқ вә 11 йиллиқ қамаққа һөкүм қилинған.
Хәвәрдә ейтилишичә бу иккийлән юқири дәриҗилик рәһбири кадир болуп ишләватқан мәзгилләрдә он нәччә милйон сом пара алған, уларниң қамақ җазасиға учришиниң уйғурлар дияридики сиясий муһит билән алақиси барлиқи һәққидә һечқандақ мәлумат йоқ.
“бүйүк ера” торидики хәвәрдә дейилишичә һәмдә алақидар әһваллардин хәвәрдар кишиләрниң баянлириға қариғанда уйғур дияри изчил һалда бейҗиңдики “җяң земин гуруһи” ниң увиси, дәп қарилип кәлмәктә. Бу қетим қамаққа һөкүм қилинған бу иккийлән җяң земин гуруһидики ғоллуқ һоқуқдарлардин җу йоңкаң заманисидә униң шериклири, дәп қариливатқан ваң лечуән вә җаң чүншйәнниң биваситә қол тиқиши билән өстүрүлгәнләр икән. Шу сәвәбтин бу қетимқи қолға елиш һәрикитини хитай анализчилири “ши җинпиң йолға қоюватқан җяң земин гуруһиниң шинҗаңдики тәсирини тазилаш һәрикитиниң бир қисми болуши еһтималға толиму йеқин” дәп қаримақта.
Бу йил киргәндин башлапла уйғурлар диярида җаң чүншйән дәвридә өстүрүлгән көплигән юқири дәриҗилик әмәлдарлар, җүмлидин “шинҗаң университети” ниң муавин мудири дилмурат ғопурҗан, орманчилиқ назаритиниң назири ниҗат мәһмуд, маарип назаритиниң назири саттар савут, хотән вилайәтлик сақчи идарисиниң муавин башлиқи ниҗат авут қатарлиқлар вәзиписидин қалдурулуп тәкшүрүлгән иди.