Intizam jazasigha uchrighan xotenning sékrétari chén yüenxu'aning pahishiwazliq qilmishimu sökülüshke yüzlendi

Muxbirimiz shöhret hoshur
2016.09.28

Uyghur aptonom rayonluq partkom intizam tekshürüsh komitéti xoten sheherlik partkomning sabiq sékrétari chén yüenxu'aning intizamgha éghir xilapliq qilghanliqi üchün partiyidin chiqirilghanliqi we xizmitidin toxtitilghanliqini élan qilghan.

“Xitay xewer tori” ning bügünki bu heqtiki xewiride, chén yu'enxu'aning hoquqidin paydilinip zor miqdarda para élish, hökümet puligha xiyanet qilish, yolsiz halda yéqinlirigha nep yetküzüsh, yer we mal-mülük igiliwélish qatarliqlardin bashqa, turmush istildikimu buzuqchiliqi, yeni uzun dawam qilghan pahishiwazliq qilmishimu tilgha élin'ghan.

Muhajirettiki Uyghur közetküchilerning bayan qilishiche, yerlik ahalilerning musulman kimliki seweblik, Uyghur rayonining emeldarliri arisidiki istil exlaqsizliqi mesilisi, rayonda intayin jiddiy we sezgür mesile hésablinidu؛ közetküchilerning bildürüshiche, bu xil mesile rayonda bezi chaghlarda chong siyasiy we milliy isyanlarning qozghilishigha türtke bolghan.

Bügünki xitay we chet'el xewerliride chén yu'enxu'aning pahishiwazliq qilmishi tilgha élin'ghan bolsimu, emma uning buzuqchiliq qilmishigha chétishliq kishilerning kimlikliri téxi tilgha élinmighan. Bu tepsilatlarning buningdin kéyin ashkarilinish we buning xotenning nöwettiki jiddiy weziyitige tesir körsitish éhtimalliqi perez qilinmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.