Sabiq xitay mu'awin herbiy ishlar komitéti re'isining öyidin bir tonnidin artuq neq pul tépilghan

Muxbirimiz erkin
2014.11.21

“Sumurgh” heptilik zhurnilining ashkarilishiche, herbiy teptishler sabiq xitay merkizi herbiy ishlar komitétining mu'awin re'isi, général shü seyxoning öyini axturup, bir tonnidin artuq neq pul tapqan.

Shü seyxo xiyanetchilik bilen eyiblinip kompartiyedin qoghlap chiqirilghan. Da'iriler uning herbiy sotqa tartilidighanliqini élan qilghan bolsimu, biraq qanchilik pulgha xiyanet qilghanliqini élan qilmay kéliwatqan idi.

Béyjingda olturushluq öktichi zat xu jyaning ilgiri sürüshiche, “Sumurgh” zhurnili hökümet sistémisidiki mejmu'e bolup, da'iriler bu uchurni mezkur zhurnal arqiliq meqsetlik ashkarilighan bolushi mumkin.

“Sumurgh” zhurnilining xewiride, xitay herbiy teptish da'irilirining bu yil 3‏-ayda shü seyxugha qarashliq bir dachini axturup, dachining yer asti öyidin bir tonnidin artuq neq pul, nurghun qimmetlik resim, hösni xet we altun jabduqlarni tapqanliqini bildürgen.

Xitay hökümiti shü seyxoni xiyanetchilik bilen eyibligen bolsimu, biraq bezi közetküchilerning qarishiche, u bo shiley, jow yongkang qatarliqlarning shi jinpinggha siyasiy tuzaq qurup hoquq tartiwélish pilanigha chétishliq bolushi mumkin.

Bu qarash da'iriler teripidin ispatlanmighan bolsimu, lékin u chet'eldiki xitay tor betliride izchil éqip yürgen bir xil qarashtur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.